ATR yekâne qırımtatar telekanalı maddiy yardım istey. Bu aqqında telekanal saytında derc etilgen muracaatta aytıla.
Telekanal «Qırımnı azat etüv fonduna» para yollamağa rica ete.
«Yıllar devamında bizler tecribeli jurnalist, rejisser, operatorlar taqımını topladıq. 2014 senesi Qırımnı işğal etken Rusiye basqılarına baqmadan (yayın yasağı, tintüv, hadimlerge qarşı cinaiy iş ve qorquzuvlar), telekanalımız Kiyevden yayın yapmağa devam ete. Onıñ seyirciler arttı: ATRni qırımtatar evlerinde, Qırımdaki Ukraina vatanperverleri evlerinde baqmaqnen beraber, bütün memlekette baqalar. Uydu kanalları ve internet sayesinde – bütün dünya baqa», – dep aytıla muracatta.
«Ukraina ve dünya Qırımda olğanlarnı, qırımtatar tarihı ve medeniyetini bilsin dep, elimizden kelgenini yapamız», – dep aytıla muracaatta.
Aprel 1-den itibaren ATR yarımadada çalışmay, çünki telekanalğa Rusiye litsenziyası berilmedi. ATR telekanalı qıtaiy Ukrainada yayınğa başladı.
Öldürilgen Rusiye muhalifetçisi Boris Nemtsovnıñ qızı Janna bildirgenine köre, oña berilgen «Birdemlik» Poloniya mukâfatınıñ bir qısmı ATR qırımtatar telekanalına ketecek.
Telekanal saibi Lenur İslâmov qıtaiy Ukrainada yaşap, sentâbr 20-de başlağan Qırım qamaçavınıñ baş teşebbüsçilerinden biri ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
