Link açıqlığı

Fevral 22-de Qırım ile memuriy sıñırda Rusiye sıñırcıları tarafından qırımtatarlarnıñ yaqalanması yarımada qamaçavı aqqında cinaiy işnen bağlı ola bile.

Bunı Qırımtatar Milliy Meclisiniñ reis muavini Nariman Celâl Qırım.Aqiqatqa bildirdi.

«Qırımtatarlarnı bundan evel de bir qaç saatke yaqalağan ediler. Men de bunı yaşadım, altı saat, bir saat, 40 daqqa tutqan ediler. Bir çoq adam, faal olmasa da, Rusiye sıñırcılarınıñ diqqatını celp etken edi. Rusiyede talimler başladı, bir çoq adam bu üç saatlik talimlerge çağırılğan edi. Unutmayıq, Qırımda qamaçavğa qarşı cinaiy iş açıldı», – dep ayttı o.

Qırım uquq qorçalayıcı gruppası (QUQG) bildirgenine köre, fevral 22-de Qırım kirişinde Rusiye mahsus hızmetleri qıtaiy Ukrainadan Qırımğa «Çonğar» kiriş noqtasından ketken genç qırımtatarlarnı yaqalay ediler.

Uquq qorçalayıcılarnıñ malümatına köre, erkeklerni «subet odalarına» alıp kete ediler.

Nariman Celâl bunıñ kibi şikâyetler şahsen oña kelmegenini bildirdi.

2015 senesi dekabr 21-de Poklonskaya bildirdi ki, Rusiye işğal etken Qırım ile memuriy sıñır qamaçavı aktsiyasınıñ koordinatorı, iş adamı Lenur İslâmov ğıyabiy şekilde sabotaj ile qabaatlana.

Dekabr 3-te mahkeme İslâmovnıñ mal-mülkini tevqif etti. ATR qırımtatar telekanalı, «SimSitiTrans» şirketi, «Cast Bank» bankı ve Apple tükânları oña aittir.

2015 senesi sentâbr 20-de qırımtatar liderleriniñ teşebbüsi ile Qırımğa aşayt malını alıp ketken yük maşinaları blok etilmege başlandı.

2016 senesi yanvar ortalarında Qırım qamaçavı aktsiyası formatını deñiştirdi. Qamaçav iştirakçileri «Asker» birleşmesi erkânında ukrain sıñırcıları ile beraber hızmet etmege azırlanalar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG