Kiyevdeki Ukraina edebiyat milliy müzeyinde qırımtatar siyasiy ve devlet erbabı Noman Çelebicihan ölüminiñ 98-inci yıllığına bagışlanğan hatıra aqşamı olıp keçti.
Birinci Qırımtatar Milliy Qurultayı reisiniñ ayatı ve faaliyeti aqqında tedqiqçi, şarqşınas, cemaat erbabı Yuriy Kosenko, qırımtatar tarihçısı Gülnara Bekirova, islâm mütehassısı, cemaat erbabı Seyran Arifov tarif ettiler.
Qırımtatar Milliy Meclisiniñ reisi Refat Çubarov Noman Çelebicihannıñ qırımtatar halqı içün rolü aqqında aytıp, böyle insanlar «büyük bir tayanç» olğanını qayd etti.
«Noman Çelebicihannı hatırlasaq, er bir halq aq-uquqlarını qorçalamaq kerek, soñra bu halqnıñ bütün qomşuları onı ürmet etecek», – dep ayttı Çubarov, haber ete Qırım.Aqiqat mühbiri.
Tedbirde UMMA Ukraina musulmanları diniy idaresiniñ reisi Said İsmagilov da bar edi.
Noman Çelebicihan 1885 senesi molla qorantasında dünyağa keldi. Bağçasaray, İstanbul ve Sankt-Peterburgda oqudı, qırımtatar yaşlarınıñ maarif ve inqilâp teşkilâtlarında iştirak etti. Çelebicihan – qırımtatarlarnıñ «Ant etkenmen!» milliy gimniniñ müellifidir.
Fevral inqilâbından soñ Qırım müftisi oldı, soñra – birinci Qırımtatar Milliy Qurultayınıñ reisi. 1918 senesi yanvar ayında bolşevikler tarafından apiske alındı, fevral 23-te Aqyar apishanesinde öldürildi. 33 yaşında Noman Çelebicihannıñ cesedi deñizge atılğan edi.
Fevral 23 künü Qırımda Rusiye bayramı qayd etile – Vatan imayecisi künü.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
