Link açıqlığı

Saatnıñ esas haberi

Aqmescitniñ merkeziy camisinde Noman Çelebicihannıñ ayatı aqqında film kösterilecek – QAMDİ


Noman Çelebicihan
Noman Çelebicihan

Qırım ve Aqyar musulmanları diniy idaresi fevral 23-te Aqmescitniñ Kebir Camisinde qırımtatar erbabı Noman Çelebicihannıñ hatırasına tedbirler keçirilecegini bildire.

Qırım müftiyliginiñ matbuat hızmeti bergen malümatına köre, tedbir çerçivesinde Noman Çelebicihannıñ ayatı ve faaliyeti aqqında qısqa bir vesiqalı levha numayış etilecek.

«Din ve cemaat erbapları, tarihçılar çıqışta bulunacaq, dua oqunacaq. Qırımtatar cemaat-siyasiy erbabını añma tedbirine er kes davetli», – dep aytıla ilânda.

Fevral 23-te Kyivdeki Ukraina milliy edebiyat müzeyinde qırımtatar siyasiy ve devlet erbabı Noman Çelebicihannıñ hatıra aqşamı keçirilecek.

Programmağa binaen, tedqiqçi, şarqşınas, cemaat erbabı Yuriy Kosenko, qırımtatar tarihçısı Gülnara Bekirova ve islâm mütehassısı, cemaat erbabı Seyran Arifovnıñ Çelebicihannıñ ayatı ve faaliyetine dair çıqışları olacaq. Çelebicihannıñ ukrain tiline tercime etilgen şiirleri oqulacaq ve efsaneviy qırımtatar qaramanı aqqında «Alim» filmi (1926) kösterilecektir.

Noman Çelebicihan 1885 senesi molla qorantasında dünyağa keldi. Bağçasaray, İstanbul ve Sankt-Peterburgda oqudı, qırımtatar yaşlarınıñ maarif ve inqilâp teşkilâtlarında iştirak etti. Çelebicihan – qırımtatarlarnıñ «Ant etkenmen!» milliy gimniniñ müellifidir.

Fevral inqilâbından soñ Qırım müftisi oldı, soñra – birinci Qırımtatar Milliy Qurultayınıñ reisi. 1918 senesi yanvar ayında bolşevikler tarafından apiske alındı, fevral 23-te Aqyar apishanesinde öldürildi. 33 yaşında Noman Çelebicihannıñ cesedi deñizge atılğan edi.

Fevral 23 künü Qırımda Rusiye bayramı qayd etile – Vatan imayecisi künü.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG