Link açıqlığı

Saatnıñ esas haberi

Celâl: belgisiz şahıslar Aqmescitte Meclis binasına sürip kirdi


Qırımtatar Milliy Meclisi reisiniñ birinci muavini Nariman Celâl dey ki, bazar künü, fevral 21-de, belgisiz şahıslar Aqmescitte Meclis ofislerinden birine sürip kirgen.

«Bugün belgisiz şahıslar Aqmescitte Jidkov soqağı boyunca yerleşken Qırımtatar Milliy Meclisiniñ ofislerinden birine sürip kirdi. Belgisiz insanlar, üç insandır, qapını qırıp, azbarğa kirdi, bundan soñ pencerelerni de sındırıp, içeri kirdiler. İçeride iş odalarına cam qapılarını qırrğanlar. «Qırım» fondunıñ temsilcisi degeni kibi, sanki bir şeyni hırsızlamağanlar», – yazdı Celâl Facebookta.

O hatırlattı ki, 2014 senesi senbât 16 künü «uydurılğan sebeplerden Qırım uquq qoruyıcıları Meclisniñ merkeziy ofisinde 11 saatlıq tintüvni keçirgen edi».

Qırım uquq qoruyıcı gruppası halqara teşkilâtlarğa Qırımda Qırımtatar Milliy Meclisini yasaq etmege mümkün olmağanı aqta arizası ile muracaatta bulundı. Beyanatta uquq qoruyıcılar halqara teşkilâtlarnı qırımtatarlarğa ve Qırımtatar Milliy Meclisine qarşı siyasiy taqiplerge yol bermemek içün areket etmege çağıralar.

Vesiqa Qırımnıñ Rusiye prokurorı Natalya Poklonskayanıñ Qırım Yuqarı mahkemesine Qırımtatar Milliy Meclisini ekstermist teşkilât olaraq tanımağa ve Rusiye Federatsiyası territoriyasında faaliyetini yasaq etmege ricası ile bergen arizasına cevaptır.

«Qırımtatar Milliy Meclisine Rusiye qanuniyetiniñ «antiekstremist» qararlarınıñ qullanuvı tek Qırımtatar Milliy Meclisiniñ temsilcileriniñ degil de, qırımtatar halqınıñ diger vekilleriniñ cinaiy taqibi ile bite bile», – denile beyanatta.

Uquq qoruyıcılar deyler ki, Meclis yetekçileri Qırımnıñ Rusiyege qoşuluvını tanımay ve Ukraina topraq bütünligine qol tutalar.

Ariza Ukrainada İnsan aqları boyunca BMT nezaret eyyetiniñ başı Fiona Freyzer, Ukrainada AB temsilciliginiñ başı Yan Tombinskiy, İnsan aqları boyunca Avropa Şurasınıñ komissarı Nil Muyjniyeks, Ukrainada Avropa Şurası ofisiniñ reisi Vladimir Ristovskiyge yollanıldı.

Poklonskaya Meclis faaliyetini yasaq etmek qararını añlatqanı kibi, «soñ zamanları Qırım cumhuriyeti prokuraturasına qırımtatar ealisi tarafından Rusiye Fedeartsiyasında resmiyleştirilmegen teşkilâtnıñ faaliyetini qanunsız ve tarik etici olaraq tanımağa ricası ile muracaatlar kele».

Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.

Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG