Litvaniya Tış işler nazirligi Rusiye Federatsiyasınıñ uquq qoruyıcı organlarınıñ Qırımtatar Milliy Meclisiniñ faaliyetini yasaq etmek niyetini siyasiy taqip ve «qanunsız sürette işğal etilgen Qırımda siyasiy serbestlik ve insan aqlarınıñ qaba bozuluvı» olaraq tanıy. Bu aqta Litvaniya nazirliginiñ beyanatında aytıla.
«Rusiye Federatsiyasınıñ qorquzuv siyasetiniñ ve aqları oğrunda küreşken ve işğalci akimiyetke qarşı çıqqan qırımtatarlarnıñ iradesini bozmağa ıntıluvınıñ bir nümünesidir», – deyler mında.
Beyanatta qayd etilgeni kibi, Litvaniya halqara cemaatçılıq kibi Rusiye Federatsiyası tarafından 2014 senesi Qırımnıñ işğalini tanımay. «İşbu işğalni ve Qırımda bugün olğan işğalci akimiyetniñ devlet organlarını ve olarnıñ areketlerini qanunsız sayamız», – denile beyanatta.
Vesiqada yazılğanı kibi, «tatar cemiyeti ile sıq tarihiy munasebetleri olğan» ve memleketinde milliy cemiyetlerniñ aq ve serbestligini qoruğan Litvaniya eki yıl devam etken «Ukrain Qırım Muhtar Cumhuriyetinde qırımtatar ve ukrainlerge nisbeten Rusiye Federatsiyası tarafından insan aqlarınıñ bozuluvını» takbih ete.
Poklonskaya Meclis faaliyetini yasaq etmek qararını añlatqanı kibi, «soñ zamanları Qırım cumhuriyeti prokuraturasına qırımtatar ealisi tarafından Rusiye Fedeartsiyasında resmiyleştirilmegen teşkilâtnıñ faaliyetini qanunsız ve tarik etici olaraq tanımağa ricası ile muracaatlar kele».
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
