Link açıqlığı

Cemilev Frenkistan Tış işler nazirliginiñ temsilcisine Qırımda repressiyalarnıñ artması aqqında bildirdi


Ukraina prezidentiniñ qırımtatar halqınıñ işlerinden vekâletlisi Mustafa Cemilev Frenkistan tış işler nazirliginiñ qıtaiy Avropa departamentiniñ müdiri Florence Mangin ile körüşti. Bunı vekâletliniñ matbuat hızmeti bildire.

«Körüşüv devamında işğal etilgen yarımadada vaziyetniñ beterleşüvi aqqında söz ketken edi. Şu cümleden, Mustafa Сеmilev qırımtatarlarğa qаrşı ayırımlarnıñ artması aqqında tarif etti: faallerniñ yaqalanuvı, mülkniñ zapt etilmesi, tintüvler, insanlarnıñ ğayıp oluvı aqqında ve ilâhre. Ayrı diqqat işğalci akimiyetniñ qırımtatarlarnıñ yuqarı temsiliy organı olğan Meclisniñ faaliyetini yasaq etmek niyetine celp etilgen edi», – denile beyanatta.

«Rusiye qırımtatarlarnı quvmaq içün er şeyni eter. Qırımtatarlarnı tuvğan torpağından ketmege mecbur etecek şaraitlerni meydanğa ketire», – dedi Cemilev.

Onıñ sözlerine köre, qırımtatarlar öz qarşılığı ve milliy areketiniñ zulumsız tabiatını saqlay.

Beyanatta bildirilgeni kibi, Florence Mangin Frenksitan tarafından qırımtatarlarğa tam destek olğanını bildirdi ve Frenkistan Ukraina topraq bütünligi boyunca mevamını deñiştirmegenini qayd etti.

«Frenkistan Rusiye tarafından Qırımnıñ qanunsız işğalini tanımay ve tanımaycaq», – dep bildire Florence Manginniñ sözlerini vekâletliniñ matbuat hızmeti.

Poklonskaya Meclis faaliyetini yasaq etmek qararını añlatqanı kibi, «soñ zamanları Qırım cumhuriyeti prokuraturasına qırımtatar ealisi tarafından Rusiye Fedeartsiyasında resmiyleştirilmegen teşkilâtnıñ faaliyetini qanunsız ve tarik etici olaraq tanımağa ricası ile muracaatlar kele».

Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.

Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG