Qırımtatar Milliy Meclisiniñ ola bilecek yasağı – Rusiye akimiyetiniñ Qırımdan qırımtatarlarnı quvmağa nevbetteki ıntıluvıdır. Bunı Kiyevde fevral 17 künü Meclis reisi Refat Çubarov matbuat konferentsiyasında bildirdi.
«İşğalci akimiyetniñ areketlerinde iç bir şübe yoq. Qarar alınacaq. Şunıñ içün Qırımda, añlamalısıñız, mahkeme olaraq adlanılğan er şey… sahtedir. Kreml qarar bere ve Qırımğa yollay. Meclis yasaqlanacaq», – dedi o.
Çubarovnıñ fikrine köre, söz regional meclislerine saylanılğan «biñlerce insan» aqqında kete. «Meclis azalarınıñ büyük bir qısmı Qırımdan quvulacağını añlaymız», – dedi o.
Çubarovnıñ fikrine köre, «Qırımda azırlanğan daa da çoq cinayetlerniñ» ögüni almaq içün Rusiyege qarşı cezalarnı arttırmaq kerek».
«Şeriklerimiz ile şunı muzakere etemiz ki, Rusiyege qarşı halqara cezalarnıñ arttırılması, bu sualniñ BMT Havfsızlıq şurasınıñ toplaşuvına çıqarmaq», – qayd etti Meclis reisi.
Poklonskaya işbu qararnı añlatqanı kibi, «soñ zamanları Qırım cumhuriyeti prokuraturasına qırımtatar ealisi tarafından Rusiye Fedeartsiyasında resmiyleştirilmegen teşkilâtnıñ faaliyetini qanunsız ve tarik etici olaraq tanımağa ricası ile muracaatlar kele».
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
