Qırımğa bağışlanğan bediiy keramika sergisi Yuqarı Rada ayatlarında açıldı. Gruşevskogo, 5 soqağında yerleşken parlamentniñ üçünci qatında Ay-Petri dağınıñ qara-beyaz tasviri ile keramik pannosı turğan sergini yerleştirdiler. Panno qırımtatar ve ukrain örnekleri ile taşçıqlarnen yaraştırılğan.
Panno müellifleri Qırım ressamı Rustem Skibin ve Kiyev ressamı Oleg Tistol. Sergide – bebe başlarını ve ağaçlarğa tıqılğan baltalarnı, şainlerni timsal etken keramik tasvirleri taqdim etilgen. Bundan da ğayrı, Ruste Skibinniñ müelliflik kermak savutı taqdim etilgen.
Leyha teşkilâtçısı In Art agentligidir, reberi – Georgiy Brailovskiy. Sergide Vlad Ralko, Vladimir Büdnikov, Nikolay Matsenko, Oleg Tistol ve Rustem Skibin işleri taqdim etilgen.
Rustem Skibinniñ aytqanına köre, leyha sekizden ziyade ukrain ve qırımtatar ressamını birleştirdi.
«Bu resimlernen bugün memleketimizde olğan meselelerni, telüke, accını kösterecek olamız. Sanaat vastası ile er keske ne olğanını añlatmağa isteymiz. Ressamlar çette qalmay. Merkeziy eser – Oleg Tistolnıñ ve menimkidir. Qırım dağını kösteremiz, onı tamır halqı olaraq körem ve onıñ medeniyeti, alt qatı, alt seviyesi, halqımıznıñ kodu.Bizim içün er bir seyircniñ, sergimizge kelecek er bir deputatnıñ fikri müim. Vazifemiz – memleketniñ baş uquq çıqarıcı organına accımıznı añlatmaq», – dey Skibin.
Qırım.Aqiqatqa Qırm işlereinden haber siyaseti naziriniñ keñeşçisi Emine Ceppar aytqanı kibi, Qırım aqqında aytmaq içün bütün meydançıqlarnı qullanmağa kerek. «On insan baqmayıp keçe bile, amma on biricisi toqtap, tüşünecegine ümüt besleymiz. Ay-Petri dağı – halqımıznıñ timsalidir. Şain, qorçalağan quşlarnıñ olması ümüt bere. Şainler olğanına qadar – tunnelniñ soñunda yarıq ta bar», – dey Ceppar.
«Şimdi Qırımda olğanını nazarğa alsaq, sergide bebeylerniñ başlarında, baltalarda abartuv yoq. Bizim – dağ, dağlarnı ve canlarımıznı qoruğan şainlerni kösteremiz. Biri balta qurucılıq aleti olğanı aqqında dey. Başqa taraftan, ailege telüke olğan zamanda, bu balta küreş aleti ola. Kremlge bizim tenbimizdir, böyle añlayım», – dey Qırımtatar Milliy Meclisiniñ reisi Refat Çubarov.
Sergi fevral 16-20 künleri çalışacaq.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
