Link açıqlığı

Rusiyede «Memorial» uquq qoruyıcı merkezi apiste yatqan Ahtem Çiygoz, Ali Asanov ve Mustafa Degermencini siyasiy mabüs olaraq tanıdı.

Bu aqta merkezniñ saytında fevral 15 künü aytıla.

«Yevromaydan»ğa qol tutqan Qırımtatar Meclisiniñ temsilcileri taqipke oğralğanını nazarğa alsaq, siyasiy ceet açıq-aydın ola», – denile beyanatta.

Uquq qoruyıcılar deyler ki, 1949 senesi avgust 12 künü alınğan Jeneva beyannamesiniñ 70-nci maddesine köre, «işğal etici devlet işğalden evel ya da onıñ muvaqqat toqtatılması vaqtında yapılğan areketler, fikirler içün şahıslarnı taqip ya da takbih etip olamay».

«Memorial» uquq qoruyıcı merkezi «fevral 26 işi» boyunca yaqalanğanlarnı azat etmege ve Qırım parlamenti yanında kütleviy tertipsizlikler aqta işni qapatmağa talap ete.

Merkezniñ malümatına köre, Ahtem Çiygoznı 8-15 yılğa azatlıqtan marum ete bileler, Ali Asanov, Mustafa Degermenci, ve şimdi apiste yatmağan – Eskender Kantemirov, Eskender Emirvaliyev, Arsen Yunusovğa – 8 yıllıq apis cezasını bere bileler. Evel qabaatını tanığan Talât Yunusov ve Eskender Nebiyev 2,5 yılılq şartlı apis cezasını alğanlar.

Rusiye taqiqatçısınıñ malümatına köre, Meclis reisiniñ birinci muavini Ahtem Çiygoz 2014 senesi fevral 26-da Qırım parlamentiniñ binası yanında kütleviy çatışmalarnı teşkil etti, Mustafa Degermenci, Ali Asanov, Eskender Kantemirov, Talât Yunusov, Eskender Yemirvaliyev ise olarğa qoşulğan ediler. O künü Qırım Yuqarı Radasınıñ binası yanında birden eki miting olıp keçken edi. Bir taraftan Ukraina topraq bütünligine qoltutqanlar bar edi. Ekinci taraftan – Qırımnıñ şimdiki «yolbaşçısı» Sergey Aksenov idare etken «Rus birligi» firqasınıñ faalleri. Yüz bergen çatışmada eki insan can berdi, taqiqat malümatına köre, 79 kişi zarar kördi. Mahküm etilgenler qabaatlarını tanımayıp, cinaiy iş siyasiy sebeplerden açılğanını bildireler.

Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG