Aqmescitte fevral 15 künü Qırımnıñ Rusiye Yuqarı mahkemesinde «fevral 26 işi» boyunca mahkeme toplaşuvı keçe. Qırım.Aqiqatqa Rusiye advokatı Nikolay Polozov aytqanı kibi, mahkeme iş iştirakçisi – Qırımtatar Milliy Meclisi reisiniñ muavini Ahtem Çiygozğa qarşı qabaatlarnı muayyenligi meselesine qayttı.
«Mahkemeciler munaqaşa odasına kettiler, Ahtem Çiygoznıñ işbu qabaatqa alâqası meselesine qaytqanlar. Degeni kibi, qabaat CPK qaidelerine ters kele, yani insanğa muayyen qabaat berilmeli. Çiygozğa seslendirilgen qabaat şübelidir. Bu sebepten o işniñ prokuraturağa qaytarılması ve soñunace taqiq etilmesi aqta şefaatını taqdim etken edi. Mahkemeciler keñeşke çıqtılar», – dey Çiygoznıñ imayecisi Polozov.
Onıñ fikrine köre, mahkeme bu esnasqa böyle bir diqqat ayrılacağını tüşünmedi. Şimdi «qabaatlayıcı tarafnıñ mevzimini pekitecek olğanlarını» tahmin ete.
Rusiye taqiqatçısınıñ malümatına köre, Meclis reisiniñ birinci muavini Ahtem Çiygoz 2014 senesi fevral 26-da Qırım parlamentiniñ binası yanında kütleviy çatışmalarnı teşkil etti, Mustafa Degermenci, Ali Asanov, Eskender Kantemirov, Talât Yunusov, Eskender Yemirvaliyev ise olarğa qoşulğan ediler. O künü Qırım Yuqarı Radasınıñ binası yanında birden eki miting olıp keçken edi. Bir taraftan Ukraina topraq bütünligine qoltutqanlar bar edi. Ekinci taraftan – Qırımnıñ şimdiki «yolbaşçısı» Sergey Aksenov idare etken «Rus birligi» firqasınıñ faalleri. Yüz bergen çatışmada eki insan can berdi, taqiqat malümatına köre, 79 kişi zarar kördi. Mahküm etilgenler qabaatlarını tanımayıp, cinaiy iş siyasiy sebeplerden açılğanını bildireler.
Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
