Qırımda fevral 12 künü qırımtatarlarnıñ evlerinde tintüvlerniñ keçirilmesi devam ete. Qırım adliyecisi Emil Kürbedinovnıñ aytqanı kibi, bir on tintüv keçirile. Bunı o Qırım.Aqiqatqa bildire.
Onıñ sözlerine köre, şimdi tintüvler Bağçasaray rayonı (Küçük Yaşlav köyü), Seyitler ve Canköy rayonında (Qambar Vaqıf köyü) keçe.
«Tintüvlerniñ tam sayısı belli degil, daa devam ete, malümatnı teşkeremiz, amma Qırım boyunca ondan az olmağanını şimdi de ayta bilem. Tintüvlerni qırımtatarlarda, Qırım musulmanlarında keçireler, dedi adliyeci.
Kürbedinov dey ki, kütleviy tintüvler qırımtatarlarnıñ evlerinde eki kündir keçe, olarnı «ayırım ve qorquzuv tedbirleri» olaraq tanımağa mümkün.
Fevral 11 künü sabasından Qırımda qırımtatar faalleriniñ evlerinde tintüvler keçirildi. Uquq qoruyıcınıñ yaqalanuvı aqqında haber etken ediler. Qırımtatar Milliy Meclisi reisiniñ birinci muavini Nariman Celâlnı prokuraturağa çağırdılar. Uquq qoruyıcılar işbu vaqialarnı izaatlamay.
Qırımnıñ Rusiye FSB idaresi tarafından «Hizb ut-Tahrir» terroristik teşkilâtında faaliyet» cinaiy işiniñ çerçivesinde dört insan yaqalanğan. Bunı akimiyet tarafdarı olğan «Krıminform» haber agentligine Qırımnıñ Rusiye prokurorı Natalya Poklonskaya bildirdi.
Ukraina musulmanları diniy idaresiniñ reisi Said İsmagilov dey ki, fevral 11 künü qırımtatarlarnıñ evlerinde tintüvler Qırım musulmanlarını «terrorist» olaraq köstermek içün yapılğan. Bunı o, tintüvlerge oğrağan 12 insannıñ adını berip, Facebookta yazdı.
Cuma künü, fevral 12-de, Kiyevde Ukraina Tış işler nazirligi binasınıñ yanında qırımtatarlar Qırımda Rusiye mahsus hızmetleri tarafından qırımtatarlarnıñ evlerinde keçirilgen tintüvlerge cevap bermege talabı ile aktsiyağa toplana.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
