Qırımda «fevral 26 işi» boyunca apiste yatqan Qırımtatar Milliy Meclisi reisiniñ muavini Ahtem Çiygoz dey ki, onı siyasiy nazarları sebebinden apiste tutalar ve Qırımda mahkeme tertibatınıñ uslu olacağına işanmay bile.
Bu aqta o Qırım Yuqarı mahkemesi fevral 4 künü red etken şikâyet arizası boyunca mahkeme toplaşuvında ayttı. Çiygoznıñ nutqunı Qırımtatar Milliy Meclisiniñ matbuat hızmeti aşkâr etti.
«Şahsiy menfaat körüne ve prokuratura mahkemecilerge basqı etmektedir. Usluğa ümüt beslemege acet yoq. Prokuraturanıñ delilleri o qadar uydurılğan ki, Rusiye Federatsiyasınıñ ne mahkeme tertibatına, ne uquq qoruyıcılarına şeref etmey», – dey Çiygoz.
«E, men Ukraina vatandaşım, bunı cinayet olaraq tanımayım. Menimce, Ukraina devletine çalışqan prokuroatura reberleri öz antından vazgeçip, menden ümdelerim içün intiqam ala», – dedi Meclis reisiniñ muavini.
Çiygoz nevbetteki sefer Qırımnı terk etmege niyeti olmağanını bildirdi.
«Meni siyasiy ümdelerim içün reine olaraq tutqanlarını tüşünem. Menim tevqifim ile halqımnı qorqutmağa tırışalar. Qırıda akimiyet ve prokuratura is etken problemlerini maña yükleycek olalar. Bu mahkeme toplaşuvlarında prokurorlardan defalarca aytılğan edi. Mahkemeciler – reinelerdir ve adaletli mahkeme aqqında söz yürsetmege sebep bile yoq», – dey Çiygoz.
Qırımnıñ Rusiye prokuraturası ve akimiyetinde Çiygoznıñ aytqanını daa izaatlamadılar.
Rusiye taqiqatçısınıñ malümatına köre, Meclis reisiniñ birinci muavini Ahtem Çiygoz 2014 senesi fevral 26-da Qırım parlamentiniñ binası yanında kütleviy çatışmalarnı teşkil etti, Mustafa Degermenci, Ali Asanov, Eskender Kantemirov, Talât Yunusov, Eskender Yemirvaliyev ise olarğa qoşulğan ediler. O künü Qırım Yuqarı Radasınıñ binası yanında birden eki miting olıp keçken edi. Bir taraftan Ukraina topraq bütünligine qoltutqanlar bar edi. Ekinci taraftan – Qırımnıñ şimdiki «yolbaşçısı» Sergey Aksenov idare etken «Rus birligi» firqasınıñ faalleri. Yüz bergen çatışmada eki insan can berdi, taqiqat malümatına köre, 79 kişi zarar kördi. Mahküm etilgenler qabaatlarını tanımayıp, cinaiy iş siyasiy sebeplerden açılğanını bildireler.
Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı
Nevbetteki mahkeme toplaşuvı Qırımda 2016 senesi fevral 15-ne planlaştırılğan.
