Link açıqlığı

Milliy ve diniy liderlerimizni çeşit siyaset oyunlarında qullanmağa tırışqanda, siyasiy erbaplarımız ve din adamlarımız farqlı yalanlarnı, telüke ya da ekiyüzlülikni vaqtında körmek içün diqqatlı olmağanda, cemaat zamanımıznıñ telükeli vaqialarına kerek olğanı kibi qıymet kesip olamağanda, halq ikmet ve sabır kösterip, birden cevap bermemek kerek.

Bizler teklif etilgen «tabiiy» qararlarğa birden qoltutmamaq kerekmiz, olarnıñ aqibetlerini talil etmek kerek.

Bizler qırımtatar halqını qoruycaq mehanizmlerni yıllar devamında şekillegen edik

Bizler qırımtatar halqını ve yaşayışımıznıñ farqlı saalarında temsil ve teşkil işlerini yapacaq qurulışlarnı qoruycaq mehanizmlerni yıllar devamında şekillegen edik.

Böyle mehanizmlerden biri Qırımdaki tarihiy topraqlarına qaytıp yerleşken halqnıñ temeli etrafında farqlı memleketlerde yaşağan qırımtatarlarnıñ birleşmesi oldı.

Neticede Bütün dünya qırımtatar kongressi (BDQK) şekillendirildi, o, Qurultay ve Meclis faaliyetleri sıñırlanğan ve olarğa açıq sürette basqı yapılğan soñ temsil vazifeleriniñ bir qısmını öz boynuna alıp, açıq munaqaşa ve eñ müim milliy meselelerde umumiy bir baqış şekillendirilmesi içün bir platforma oldı.

Qırımtatarlarnıñ diniy organı da zor şaraitlerde qaldı. Ekseriyetniñ baqışlarını qabul etip olamağan siyaset adamları yıllar devamında Qırım musulmanları Diniy idaresi qazanğan ürmet ve sayğını qullanıp, üküm sürgen siyasiy vaziyette qırımtatar halqını boysundıracaq olalar.

Qırım musulmanları Diniy idaresini Qırımnıñ tışında olğan semetdeşleri ile ananeviy alâqalarnı üzmege mecbur etecek olalar

Qırım musulmanları Diniy idaresini Qırımnıñ tışında olğan semetdeşleri ile ananeviy alâqalarnı üzmege mecbur etecek olalar.

Qırım Müftiyligi içinde ve etrafındaki vaziyet çeşit fikirlerni doğura: bazıları belli qoqlalarğa em siyasiy, em diniy ceetten boysunmağa çağıralar, digerleri bu teşkilâtnı takbih etip, ondan uzaqlaşmağa teklif eteler.

Faqat, bizim fikirimizce, eñ doğru yol başqa olmalı. Yaqın vaqıtta BDQK örnegini qullanıp, qırımtatar halqı diniy liderleriniñ şurasını qurmaq kerek. Onıñ erkânına Qırım Müftisi ve qırımtatar diasporalarınıñ diniy reberleri, em de Ukrainağa köçmege mecbur olğan Qırım musulmanları diniy teşkilâtlarınıñ reberi kirmek kerek.

Bunıñ kibi bir diniy teşkilât halqnıñ maneviy canlanması ve inkişafından ğayrı aşağıdaki imkânlar berecek:

– birinciden, soñki eki yıl içinde Qırım musulmanlarınıñ üzülgen ananeviy maneviy-diniy bağlar pekitilecek;

– ekinciden, işbu şura azaları arasında din saası içün mesüliyet bölünecek;

– üçünciden, bir taraftan, Qırım Müftiyligi etrafında olğan siyasiy oyunlar içün imkânlar eksilecek, diger taraftan ise – onıñ bir de bir areketleri sert bir şekilde takbih etilmeycek.

İşbu leyhanıñ ömürge keçirilmesi ilk evelâ Qırım müftisiniñ iradesini talap ete

İşbu leyhanıñ ömürge keçirilmesi ilk evelâ Qırım müftisiniñ iradesini talap ete.

Bunıñ kibi bir şura çalışıp başlasa, qırımtatar halqına faydası tiyecektir.

Nariman Celâl, Qırımtatar Milliy Meclisi reisiniñ birinci muavini

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün

XS
SM
MD
LG