Link açıqlığı

Saatnıñ esas haberi

Avropa Şurasınıñ eyyetine Qırımda ukrain tiliniñ vaziyeti aqqında tarif ettiler


Qırımda Avropa şurası eyyetine ukrain tilinde laf etken qırımlılarnıñ bir sıra meselesi aqqında tarif ettiler. Bu aqta Qırım.Aqiqat Radiosı efirinde Qırımda Ukrain medeniy merkeziniñ tesisçisi Leonid Kuzmin tarif etti.

Aytqanı kibi, Avropa diplomatlarına Qırımdaki vaqialar aqqında doğru malümatnı bildirip oldılar.

«İlk nevbette, Qırımda ukrain tiliniñ meselesi, çünki bugün onı mekteplerdeki ögretüv çerçivesinden alıp taşladılar. Mesele bar, TMUda ukrain tili fakulteti qapatılğan… Ekincisi, ukrain tilli qırımlılar televideniyeni tek sputnik vastası ile baqa, gazetalarnı yalıız internetten oquy bile… Qırım akimiyetiniñ Qırım ukrainlerine qarşı etken büyük cinayetlerden biri – «Svitanok» bala teatr studiyasınıñ qapatılması», – dedi Leonid Kuzmin, ve Avropa Şurası eyyetiniñ azalarına daa çoq meseleniñ añlatılğanını bildirdi.

Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.

Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG