Link açıqlığı

Qırımda Avropa Şurasınıñ eyyeti yarımadada insan aqlarınıñ bozuluvını ögrendi – faaller


Qırımğa Avropa Şurası eyyeti ziyaretiniñ esas maqsadı – yarımadada olğan vaqialar aqqında malümatnı toplamağa. Bu fikirni Qırım.Aqiqat Radiosı efirinde Qırımda Avropa diplomatları ile körüşken ukrain ekspertleri ve cemaat teşkilâtlarınıñ temsilcileri bildirdi.

Qırım uquq qoruyıcı gruppasınıñ idarecisi Оlga Skripnik aytqanı kibi, eyyet temsilcilerine olarğa Qırımda «mahsus Rusiye programması» kösterilecegi aqqında aytılğan edi, amma diplomatlar vaziyetniñ diger tarafını da körip oldılar.

«Eyyet temsilcileri, başqa taraf ile de körüşti, zarar körgenler, siyаsiy taqip qurbanları, ad ve fikir serbestiligi içün taqip etilgen insanlar ile körüşti. Şunıñ içün olar tek Qırım-Rusiye versiyasını degil de, Qırımda insan aqlarınıñ bozuluvı aqqında doğru malümatnı ögrenip olğanına ümüdimiz bar», – dey Оlga Skripnik.

Qırımtatar Milliy Meclisi reisiniñ birinci muavini Nariman Celâl aytqanı kibi, Avropa musafirleri söz serbestligi ve insannıñ diger aqlarına riayet etilmesi ile meraqlandırdı.

«İlk nevbette, Qırımda bir sıra aq ve serbestlikniñ olmasını muzakere ettik. Şu cümleden, söz serbestligi, matbuat vastalarınıñ faaliyeti serbestligi, cemaat teşkilâtlarınıñ faaliyeti, kütleviy tedbirlerniñ keçirilmesi – demokratik anayasalarda qayd etilgen şeyler, Rusiye Federatsiyasınıñ Anayasasında da bar. Amma bugün bu aqlarnıñ yerine ketirilmesini talap etmege ep qıyın ola», – dey Celâl.

Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.

Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG