Qırımda Ukrain medeniyet merkeziniñ tesisçlerinden biri Leonid Kuzmin yarımadada bulunğan Avropa şurasınıñ temsilcileri ile olğan körüşüvi aqqında bildire.
Bu aqta o Facebookta yaza.
«Bugün Ukrain Medeniy merkeziniñ temsilcileri İnsan aqları boyunca Avropa şurasınıñ baş kâtibiniñ mahsus temsilcisi Jerar Ştudman ve nezaret gruppasınıñ vekilleri ile körüşüv olıp keçti. Körüşüv devamında Avropa Şurası temsilcilerine yarımada mekteplerinde ukrain tiliniñ yoq etilmesini, Qırımda ukrain medeniyetiniñ saqlanılması, Aqmescitte «Svitanok» bala teatr studiyasınıñ qapatılması, ukrain neşirleriniñ olmaması ile bağlı meselelerni añlatmağa tırıştım», – dey Kuzmin.
«Bunıñ ile Qırım ukrainleriniñ konkret aqlarınıñ bozuluvı ve Qırımda tınç toplaşuvlarnıñ meselesi aqqında tarif ettim», – dey o.
Aqmescitte cumaertesi künü, yanvar 30-da, Qırımtatar Milliy Meclisiniñ azaları, qırımtatar cemaatçılığı Avropa Şurasınıñ eyyeti ile körüşti. Bunı Meclis reisiniñ birinci muavini Nariman Celâl bildirdi.
Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.
Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
