Link açıqlığı

Ukraina prezidentiniñ qırımtatar halqınıñ işlerinden vekâletlisi Mustafa Сemilev Qırımda Rusiye uquq qoruyıcıları tarafından oña qarşı ilân etilgen ğıyabiy apis ve cinaiy işlerniñ açılmasını izaatladı. Bunı o, onı evine – Qırımğa kirsetmemek niyetleri ile bağlay.

Bunı Cemilev «Golos Ameriki» resursına bildirdi.

«İşniñ açılması ve apis cezası aqqında qararnı diqqatnen oqudım. Bir qaç cümlelerni bildireyim. «Silâğa 10 qurşunnıñ saqlağanı içün qabaatlana», silâ ve qurşunlar 1996 senesi alındı, buña musaade bar, qurşunlarğa izin yoq eken. Amma em Rusiye, em Ukraina qanuniyetinde qurşunlarnıñ alınmasına ayrı izin kerekmey», – dey Cemilev.

Qırımnıñ Rusiye prokuraturasınıñ «sıñırdan qanunsız keçüvi» boyunca qabaatlavını Cemilev «paranoyya ve abdallıq» olaraq adladı.

«Üçünci noqta: «Cemilevniñ Qırımda daimiy yaşav yeri yoq». Evim qayda? Ailem anda yaşay. Yani, aqiqat ve uquqa iç bir bağ yoq. Meni Qırımğa, evge kirsetmemek içün etile», – dedi qırımtatarlarnıñ yetekçisi.

Yaqında Qırım advokatı Cemil Temişev Aqmescitte Kiyev rayon mahkemesiniñ Mustafa Cemilevniñ yaqalanuvı boyunca qararı aqqında bildirdi. Bu malümatnı Rusiye matbuat vastalarına Qırım prokurorı Natalya Poklonskaya da tasdiqladı ve Cemilevniñ federal qıdıruvğa ilân etilgeni aqqında bildirdi.

İşğal etilgen Qırımda Mustafa Cemilevni sıñırdan qanunsız sürette keçüvde, silânıñ qanunsız tarzda saqlanuvında qabaatlaylar.

Ukraina Tış işler nazirliginiñ matbuat kâtibi Maryana Betsa Qırımda Ukraina prezidentiniñ qırımtatar halqınıñ işlerinden vekâletlisi ve Ukraina Yuqarı Radasınıñ deputatı Mustafa Cemilevniñ Rusiye mahkemesi tarafından taqibi mümkün olmağanı aqqında bildirde.

Evel Ukraina halq deputatı, qırımtatar halqınıñ yetekçisi Mustafa Cemilevge Rusiye tarafından işğal etilgen yarımadağa kirişni yasaqladılar.

XS
SM
MD
LG