Qırımda Rusiye Federal havfsızlıq hızmetiniñ (FSB) hadimleri Rusiye uquq qoruyıcıları ekstremizmde şeklegen qırımlılarnıñ poçtasını taqip eteler. Qırım.Aqiqat 2016 senesiniñ başında Qırım yarımadasınıñ bütün poçta bölüklerine yollanılğan cedvellerniñ kopiyasını elde etti.
Cedvellerde Rusiye uquq qoruyıcıları tarafından taqiqat tedbirlerine oğratılğan ya da Rusiye mahkemesi ile mahküm etilgen qırımlılar aqqında malümat mevcut. Vesiqada qırımlılarnıñ pasport malümatları, doğuv yeri ve oturğan yeri qayd etile.
Poçtası teşkerilecek qırımlılar arasında, – siyasiy mahbüsler Oleg Sentsov, Gennadiy Afanasyev, Aleksandr Kolçenko, Aleksey Çirniy, Rusiye Federatsiyasında «Sentsov işi» boyunca mahküm etilip büyük ceza alğanlar. Cedvelde diger insanlar da bar –
Qırım.Aqiqat müellifi Anna Andriyevskaya ve «Maydan inostrannıh del» eksperti Andrey Klimenko.
Yarımadanıñ poçta bölüklerine ketken «Qırım cedvelinde» 2015 senesi dekabr 24 künü sanı tura.
Vesiqada aytılğanı kibi, qırımlılarnıñ cedvelinde «terrorizm ile alâqası olğanına dair malümat olğan» insanlarnıñ adları yıldız ile qayd etilgen.
Qırım.Aqiqat malümatına köre, cedveldeki insanlardan birine bir şey kelse, poçta bölükleriniñ hadimleri bunı reberligine bildirmek kerekler, olar ise Rusiye uquq qoruyıcılarına haber etecekler.
«İşğalcilerniñ yapqanlarına şaşmadım. İşğal rejimine zıt kelgen er bir insannıñ Qırım ile malümat alâqalarını taqip etecek olalar. Menden yañı bir şey alamazlar. Çünki qıtaiy Ukrainadan Qırımğa mektüp yollamaq imkânsızdır. Em de informatsion tehnologiyalar çağında böyle bir şeyge kerek barmı? Faqat böyle bir adım siyasiy mahbüslerge qoltutmaq maqsadınen mektüp yollağan qırımlılar içün telükeli ola bile. FSB hadimleri olarnıñ tış dünya ile alâqalarını bozmağa tırışadırlar», – dep izaatladı mezkür areketlerni cedvelde adı keçken Qırım jurnalisti Anna Andriyevskaya Qırım.Aqiqatqa.
Ukraina Yuqarı Radası Qırımnıñ vaqtınca işğaliniñ başlanğıçı olaraq 2014 senesi fevral 20 kününi resmiy şekilde ilân etti. Ğarp memleketleri işğalni tanımayıp, bir sıra iqtisadiy ceza kirsetti. Rusiye yarımada işğalini red etip, oña «tarihiy adaletniñ tiklenmesi» dep ayta.
