Qırım advokatı Cemil Temişev bu afta Aqmescitte bir yıllıq ğıyabiy apis cezasına maküm etilgen qırımtatarlarnıñ milliy lideri Mustafa Cemilevniñ qabaatını añlattı.
Böyleliknen, Temişevniñ aytqanı kibi, Cemilev 2014 senesi mayıs 3 künü Ermeni Bazarda memuriy sıñırdan qanunsız keçüvinde qabaatlana. Rusiye taqiqatı Cemilevge o vaqıt yarımada kirişi endi yasaq etilgenine esaslana.
Bunıñ ile advokat dey ki, Rusiye taqiqatçıları Qırımda Cemilevniñ evinde silâ saqlanılmasına diqqat ete. İşbu silâdan oğlu Hayser Cemilev insannı öldürgen edi ve em Rusiye, em Ukraina qanuniyetine köre maküm etildi.
«O (Mustafa Cemilev – QA)……. adresi boyunca yerleşken eviniñ üçünci qatında demir qutusında silânı saqlay edi, ondan anahtarnı oğlu – Cemilev Hayser Mustafa oğlu bilgen yerde saqladı», – dep bildire advokat Facebookta iş malümatlarını, işte Hayser «aselet öldürüvni etkeni» aqqında yazıla, mahkemede ise aselet yapılmağan öldürüvde qabaatlandı.
Advokatnıñ aşkâr etken malümatına köre, Mustafa Cemilevni 1996 senesi qanunsız tarzda qurşunlarnıñ satın aluvı ve 2013 senesine qadar saqlanuvı içün qabaatlaylar.
Yaqında Qırım advokatı Cemil Temişev Aqmescitte Kiyev rayon mahkemesiniñ Mustafa Cemilevniñ yaqalanuvı boyunca qararı aqqında bildirdi. Bu malümatnı Rusiye matbuat vastalarına Qırım prokurorı Natalya Poklonskaya da tasdiqladı ve Cemilevniñ federal qıdıruvğa ilân etilgeni aqqında bildirdi.
İşğal etilgen Qırımda Mustafa Cemilevni sıñırdan qanunsız sürette keçüvde, silânıñ qanunsız tarzda saqlanuvında qabaatlaylar.
Ukraina Tış işler nazirliginiñ matbuat kâtibi Maryana Betsa Qırımda Ukraina prezidentiniñ qırımtatar halqınıñ işlerinden vekâletlisi ve Ukraina Yuqarı Radasınıñ deputatı Mustafa Cemilevniñ Rusiye mahkemesi tarafından taqibi mümkün olmağanı aqqında bildirde.
Mustafa Cemilevniñ özü Aqmescitte mahkeme qararını daa izaatlamadı.
Evel Ukraina halq deputatı, qırımtatar halqınıñ yetekçisi Mustafa Cemilevge Rusiye tarafından işğal etilgen yarımadağa kirişni yasaqladılar.
