Uquq qoryıcılar Qırımda milliy azlıqlarnıñ aqları ile bağlı vaziyetniñ beterleşüvini qayd eteler. Olğan malümatqa köre, yarımadada bu mesele ile bağlı vaziyet Rusiyede olğanından daa da beter.
«Bunı Milliy azlıqlar aqlarınıñ nezaret gruppasınıñ «Eki yıllıq cenk: 2015 senesi Ukrainada yabancı duşmanlığı» maruzasınıñ taqdiminde gruppanıñ temsilcisi Tatyana Bezruk bildirdi.
O şunı da qayd etti ki, 2014 senesi mayıs ayında qırımtatarlarnıñ yetekçisi Mustafa Cemilevni qarşılağan («mayıs 3 işi») ve 2014 senesi fevral 26 künü Qırım parlamenti divarları altında mitingde iştirak etken qırımtatarlarğa qarşı cinaiy işlerni açqan «Qırımnıñ Rusiye akimiyeti uquqiy alannıñ çerçivesinden keçti».
«Ebet, Qırımnıñ işğalci akimiyeti uquqiy alannıñ çerçivesinden çıqa ve Ukraina ve bütün dünya içün büyük bir mesele tura – Qırımğa halqara eyyetlerniñ kirmesi. Çünki Qırımda milliy azlıqlarnıñ aqları ile bağlı vaziyet Rusiyede olğanından da beter», – dey Bezruk.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
