Link açıqlığı

Ukraina Devlet sıñır hızmeti: Qırım qamaçavınıñ faalleri memuriy sıñırda nezaret noqtalarında bulunıp olamaz


Ukraina Devlet sıñır hızmetinde aytılğanı kibi, Qırım qamaçavı boyunca aktsiyada iştirak etken faaller öz faaliyetini Qırım ile memuriy sıñırda olğan nezaret kiriş noqtalarına avuştırıp olamaz.

Qırım.Aqiqatqa Devlet sıñır hızmetiniñ reberi Оleg Slobodân aytqanı kibi, memurlar faallerge bu kibi meselelerni añlatqan edi.

«Faallerniñ biznen beraber memuriy sıñırda bulunmağa istegine kelsek – bu istekniñ yuridik küçü yoq. Qanun nezaret kiriş noqtalarında başqa bir hızmetlerniñ bulunmasını nazarda tutmay. İş muşavereleri devamıda qanuniyet qararları añlatılğan edi», – dedi Slobodân.

Qırım.Aqiqat bildirgeni kibi, aktsiya iştirakçileri arasında aytılğanına köre, yanvar 16 kününden aktsiyanıñ yañı şekli başlanacaq. Variantlardan biri – Qırım ile memuriy sıñırda kiriş noqtalarında nezaret etüv.

Yanvar 14 künü matbuat konferentsiyasında Ukraina prezidenti Petro Poroşenko dedi ki, Qırım qamaçavı boyunca aktsiya iştirakçileri «ğayet müim iş ete», amma işğal etilgen yarımada ile memuriy sıñırda nezaret noqtalarında yüz bergen abravlarnıñ ögüni almaq kerek.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

XS
SM
MD
LG