Qırım vatandaşlıq qamaçavı boyunca aktsiyanıñ reberi Lenur İslâmov Qırım Rusiye Devlet şurasınıñ yarımada qamaçavına olğan cevabından ve spiker muavini Remzi İlyasovnıñ bu aktsiya boyunca halqara mahkemelerge muracaat etmek ğayesinden ayrette qaldı. Bu aqta o Qırım.Aqiqatqa bildirdi.
«Olar (Qırım siyasetçileri – QA) bundan evel bu olar içün sivrisenek tişlevi kibi olğanı aqqında aytqan ediler. Rusiye er kesni qurtarır ve er keske yardım eter degen ediler. Olar dey edi: kökten taş tüşse de, biz Rusiyege ketemiz. Bundan da ğayrı, halqara cemiyet olar içün emir olmağanını aytqan edi. Kremlde Avropa halqara uquğından çıqqanını bildirgen ediler. Şimdi İlyasov degen biri muracaat etecek ola. Etsin. Biz de bizge ait territoriyada bu qalp siyasetçiler tarafından etilgen areketlerniñ taqiqatını isteymiz», – dedi İslâmov.
O, İlyasovnıñ qamaçav – istiqbalsiz bir kampaniya olğanı aqqında bildirüvini de izaatladı.
«İstiqbalsizmi? Neden, öyle olsa, fevqulâde vaziyetni kirseteler, nazirlerni işten boşatalar, canlı efirde küfür sözlerni aytalar?», – dey o.
Remzi İlyasov çarşenbe künü Devlet şurası toplaşuvında Qırım vatandaşlıq qamaçavı boyunca aktsiyanı «insaniyetsiz ve istiqbalsiz kampaniya» olaraq adladı. İlyasov deputatlarnı öz mevamını bildirmege ve qamaçav sebebinden peyda olğan meselelerniñ BMT tarafından taqiqini teşebbüs etmege çağırdı.
Qırım Rusiye Devlet şurası Ukrainanı «Qırımğa nisbeten genotsid etüvinde» qabaatladı ve 2015 senesi sentâbr ayından devam etken yarımada qamaçavı boyunca aktsiyağa işmar etti. Şu cümleden, arizada aktsiya iştirakçilerinden olğan «terroristik telüke» aqqında aytıla. Deputatlar qıtaiy Ukrainadan elektrikniñ berilmesi toqtatılğanı aqqında hatırlattılar, olarnıñ fikrine köre, bundan sebep «sağlıq saqlav müessiseleri» ve hastalar içün telükeni meydanğa ketirildi. Qırım deputatları «Qırım Cumhuriyetine nisbeten genotsid»niñ taqiqatı ve toqtatılmasını talap etecek ola. Arizada «Qırım qamaçavı boyunca meseleniñ BMT Havfsızlıq Şurasınıñ kün tertibine kirsetilmesi ve neticede Halqara cinaiy mahkemege berilmesini» talap eteler. Devlet şurasınıñ vesiqasında «Ukrainanı qanunsız teşkilâtlarnıñ silâsızlandıruvı ve Qırımğa qarşı terkatlarnıñ azırlanuvını toqtatmaq içün tedbirliniñ keçirilmesi» ile bağlı talaplar bar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi. Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene edi. Amma bu yeterli degil edi. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
