Link açıqlığı

Ukraina prezidenti Petro Poroşenkonıñ fikirince, Qırımnı işğalden qurtaruv meselesiniñ al etilmesi sozulmamaq kerek. Bunı o yanvar 12-de Ukrainada çetel devletleriniñ elçileri ile olıp keçken körüşüvde ayttı, dep bildire devlet yolbaşçısınıñ matbuat hızmeti.

«Prezident Qırım meselesiniñ sozulması mümkün degil dep, yarımadanı işğalden qurtarmaq içün halqara bir mehanizm şekillendirilmesi müim olğanını qayd etti», – dep aytıla beyanatta.

Poroşenkonıñ bildirgenine köre, Ukraina «Minsk añlaşmalarına sadıq qala».

Petro Poroşenko yarımadanı işğalden qurtarmaq içün halqara bir mehanizm şekillendirilmesi müim olğanını qayd etti

«Rusiye Minskte bir elinen barışıq vesiqalarını imzalap, ekinci elinen – Ukrainanıñ Debaltsevo şeerini qanğa boğa. Halqara basqı olmasa, Rusiye toqtamaycaq. Moskva cenk baltasını taşlağanına qadar ve qomşularınıñ mustaqilligini ürmet etmege başlağanına qadar basqı devam etmeli», – dep ayttı Poroşenko. O, Donbassta halqara nezaret olmaq kerek, dep qayd etti.

Ukraina Yuqarı Radası vaqınca Qırım işğaliniñ başlanğıçı olaraq 2014 senesi fevral 20 kününi resmiy şekilde ilân etti. Ğarp memleketleri Qırım işğalini tanımayıp, bir sıra iqtisadiy ceza kirsettiler. Rusiye işğalni red etip, oña «tarihiy adaletniñ ğayrıdan tiklenmesi» ayta.

Ukrainanıñ şarqında cenk uruşları 2014 senesi aprel ayından itibaren devam ete. Bu müddet içinde, Birleşken Milletler Teşkilâtınıñ malümatına köre, anda 9 biñden ziyade insan elâk oldı.

Ukraina ve Ğarp Rusiyeni Donbasstaki Rusiyege qoltutqan bölücilerge yardım etkeninen qabaatlay. Moskva bu qabaatlarnı red etip, Donbassta Rusiye arbiyleri yoq, amma «göñülliler» bar, dep bildire.

XS
SM
MD
LG