2016 senesi Ukrainada SNBO tarafından resmiy vesiqa olaraq qabul etilgen Qırımnıñ işğalden azat etüv strategiyasınıñ ve Qırımnıñ qaytaruvı boyunca halqara gruppanıñ peyda oluvı mümkün. Bu aqta Qırım.Aqiqatqa Free Crimea leyhasınıñ müellifi Taras Berezovets bildirdi.
Onıñ sözlerine köre, 2016 senesi «işğal etilgen territoriyalar ile ne etmek kerekligi ile bağlı siyaset amelge keçirilecek». Ekspert Rusiyeniñ ukrain Donbassında etken areketlerine cevap olaraq peyda olğan Minsk añlaşmalarını numüne olaraq ketirdi ve, aytqanı kibi, işğal etilgen Qırım boyunca bu kibi kontakt gruppasınıñ peyda olması mümkün.
«Donbass boyunca müim halqara tesir aletleri bar. Minsk añlaşmaları – Frenkistan ve Almaniya iştiraki ile dört taraflı gruppa, bizim içün bu pek emiyetli. Şunıñ içün anda mesele nezaret etile. Qırım boyunca Rusiye bu kibi mehanizmlerni teşkil etmege qatiyen istemey ve, tabiiy ki, bunı etmeycek. Amma Rusiye Federatsiyasınıñ iştiraki olmadan da böyle gruppa peyda ola bile, menimce, mında, misal içün, Baltiya memleketlerini, Türkiye, Gürcistan, Moldova – Rusiye ve Rusiye istilâsından zarar körgen memleketlerni celp etmege mümkün olur», – dey Berezovets.
Onıñ sözlerine köre, ilk nevbette bu Ukraina, Moldova, Gürcistannıñ merağındadır, olar endi topraqlarını ğayıp etti ve birleşe bileler.
Bunıñ ile, Taras Berezovetsniñ aytqanına köre, 2016 senesi «devlet reberligi altında Qırım meselesi ile oğraşacaq insanlarnıñ bir taqımı peyda olur».
«Ekspertler birligi. Belki de, onı İşğal etilgen topraqlarnıñ meseleleri boyunca Milliy şura şeklinde, ya da prezident (Ukrainanıñ – QA) yanında Qırım meselelerinden şura şeklinde resmiyleştirirler»,– dedi o.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
