Qıtaiy Ukrainada Qırım Musulmanları Diniy İdaresini teşkil etecekler, baş ofisi Kiyevde olacaq. Bu aqta Ukraina prezidentiniñ qırımtatar halqınıñ işlerinden vekâletlisi, Ukraina halq deputatı Mustafa Cemilev QHA haber agentligine bildirdi.
Cemilevniñ sözlerine köre, Qırım Müftiyligi şimdi «işğalcige boysunğan».
«Olar ne dese, onı yapalar. Yani Qırım Müftiyligi şimdi Qırım musulmanlarınıñ istek ve ğayelerini aks etmey. Bunı mecburen etip olamay. Bugün anda eki Müftiylik bar – biri Tavriya, Rusiye akimiyeti onı aselet raqiplik içün teşkil etti. Anda dinsiz, imansız insanlardır. Er şey siyasiy şantaj içün. Siyasiy oyunlar alıp barıla: «Bizge boysunmasañız, camilerni Tavriya müftiyligine berermiz». Müftimiz işançsız insan olıp çıqtı. Olarğa tam boysundı. Şu sebepten biz mında qırımtatarlarnıñ istek ve tüşüncelerini aks etecek Müftiylikni teşkil etmege qarar aldıq», – dep añlattı Cemilev.
Ukraina prezidenti yanında qırımtatarlarnıñ işlerinden vekâletlisi şunı da qayd etti ki, qıtaiy Ukrainada QMDİni teşkil etmek zaruriyeti yarımadadan köçip kelgen qırımtatarlarnıñ sayısı büyük olğanı ile bağlı.
«Soñki malümatımızğa köre, Qırım yarımadasından bir 35 biñ insan köçip keldi. Olardan yarısı – qırımtatarlarıdır. Ukraina territoriyası boyunca tarqatıldılar, büyük qısmı Kiyevde, bir qısmı Ukrainanıñ ğarbında, Lviv, İvano-Frankovsk, Ternopolde ve daa bir qısmı, elbette ki, Hersonda. Bunıñ ile Hersonda daima yaşağan 7-8 biñ qırımtatarı bar, anda Ahıska türkleri de yaşay. Tabiiy ki, anda müftiylikni teşkil etmege kerek edi, amma Kiyevde olsa, daa da doğru olacağını tüşündik. Herson ve diger vilâyetlerde onıñ bölükleri ya da imamları buluna bile», – dey Cemilev.
O şunı da qayd etti ki, qıtaiy Ukrainada müftiylikni teşkil etmek suali diger diniy teşkilâtlar ile muzakere etildi ve ileride de olarnen işbirlik qurulacaqtır.
Neşirniñ bildirgenine köre, yarımada işğalinden soñ Qurultay vekili ve Qırımtatar Milliy Meclisiniñ azası olğan Qırım müftisi Emirali Ablayev Meclis işinde iştirakini toqtattı.
Qırım Musulmanlarınıñ Diniy İdaresiniñ saytında Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ bildirüvini daa izaatlamaylar.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
