Eger de Kiyevmuqavelede Qırımnıñ ukrain tarafına ait olğanı aqqında yazılmasında israr etse, Rusiye Qırımğa energetikniñ berilmesine muqaveleniñ imzalanuvına razı olmaz, ğaliba, dedi Rusiye prezidentiniñ matbuat kâtibi Dmitriy Peskov.
«Şunı eminlik ile aytmaq mümkün ki, prezident böyle şartlar esasında muqaveleniñ imzalanuvına razı olmaz», – dedi o «İnterfaks»qa Qırımda keçirilgen sorğunıñ neticelerini izaatlap.
Ukraina akimiyetiniñ bu aqta resmiy izaatı şimdilik yoqtır.
Rusiyede yanvar bir künü sanki Qırım ve Aqyar sakinleri arasında keçirilgen sorav neticelerini aşkâr ettiler. Sorav yarımadağa ukrain elektrik energiyasınıñ berilmesi aqqında muqaveleniñ imzalanuvı ile bağlı edi. Amma işbu muqavelede yarımada ukrain toprağı olaraq tanılmaq kerektir. Berilgen malümatqa köre, 6,55% bu muqaveleniñ imzalanuvına qol tuttı, 92.6% qarşı çıqtı. Mında şunı da qayd ettiler ki, Qırım sakinleriniñ 94% «üç-dört ay energetik teminlevinde ufaq-tüfek problemlerge dayanmağa azır olğanını bildirdi».
Qırımda çarşenbe künü aqşam yarımadağa «Kahovka – Titan» yolağı vastası ile berilgen elektrik energiyasınıñ söndürilmesi aqqında bildirdiler. Elektrik teminlevsiz Krasnoperekopsk, Aqşeyh, Aqmeçit, Saq, Canköy rayonları, Saq ve Kezlev rayonları qaldı. Qırım qamaçavınıñ idarecisi Lenur İslâmov faallerniñ buña alâqası bar olmağanını qayd ete.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene edi. Amma bu yeterli degil edi. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
