Qırımtatarlarnıñ milliy lideri Mustafa Cemilev dey ki, ealiniñ büyük qısmı yarımadanıñ Ukraina nezaretine qaytmasını istese bile, bu olamaz. Emindir, yarımadanıñ qaytarılması içün Ukrainağa qırımlılar içün özüne çekici bir devlet olmağa yeterli degil.
Bu aqta o Qırım qamaçavı boyunca vatandaşlıq aktsiyasınıñ neticelerini izaatlap, Qırım.Aqiqat Radiosına ayttı.
«Öyle bir nazariye bar ki, yani Qırımnı Ukraina adliye alanına qaytarmağa istesek, Qırım sakinleri Ukrainağa qaytmağa istesin dep, özüne çekici bir devletni qurmaq kerekmiz. Saçmalıqtır. Qırımnıñ 99,9% Ukrainağa istese bile, bu olamaz. Qırım sakinleriniñ tek bir aqqı bar – işğalni alğışlamaq. Başqa aqqı yoq, ve bu aqnıñ yerine ketirilmesi içün FSB areket ete. Şunıñ içün begene, begenmey kibi laflarnı yürsetmege acet yoq», – dedi Cemilev.
Dey ki, qamaçav kibi usullar daa da faydalıdır. Cemilevniñ sözlerine köre, yarımada qamaçavına qırımtatarlarnıñ 90% qol tuta.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
