Link açıqlığı

Radio Svoboda meşur ukrainler Qırımnıñ siyasiy mabuslarını Yañı yıl ile hayırlaycaq mahsus leyhanı amelge keçirdi. Yırcılar Ruslana ve Camala, jurnalist Ayder Mujdabayev, rejisser Galina Cikayeva, oyuncı ve prodüser Ahtem Seytablayev öz hayırlav sözlerini ayttılar.

Yañı yıl arfesinde Radio Svoboda ukrainlerge Qırımda «fevral 26 işi» boyunca keçken mahkümlerni, Qırımnıñ siyasiy mabuslarını hayırlamağa teklif etti. Rusiye taqiqatçıları iş iştirakçilerini 2014 senesi fevral 26-da Qırım parlamentiniñ binası yanında Ukraina topraq bütünligi ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.

Bir qaç meşur ukrain muracaatını taqdim etti. Olarnıñ arasında Jamala da bar. O, bir yıldan berli Aqmescitte apiste yatqan Qırımtatar Milliy Meclisiniñ reis muavini Ahtem Çiygoznı Yañı yıl ile hayırladı.

«Ahtem bey, Yañı yılda er şey yahşı olsun isteyim. Yaşayışıñızda er şey yerine kelsin, sağlam oluñız. Sabırlı oluñız, sabırlı! Zor, amma Allah yardım etsin ve ümüt ve işanç bağışlasın!» – dep qayd etti Jamala.

Ukrain yırcısı Ruslana Qırımnıñ Rusiye apishanesinde yatqan Qırımnıñ siyasiy mabusı, «fevral 26 işiniñ» iştirakçisi Ali Asanovnı hayırladı. Ruslana öz hayırlav sözlerini Kiyevniñ merkeziy meydanından seslendirdi.

«Yañı yıl hayırlavımnı siziñ içün, Ali Asanov, seslendirmek isteyim. Meydannıñ merkezinde bulunamız. Epimizniñ kerçek ruhı ve küçü mında başladı. Bugün menim sözlerim siziñ içün faydalı olacağını tüşünem. Yañı yılıñız hayırlı olsun! Dayanıñız, teslim olmamaq ve teslim olmağa mecbur qalmamaq içün sizge küç tileymiz! Yañı yılıñız hayırlı olsun, Allah sizni ve qorantañıznı qorçalasın!» – dedi Ruslana.

Jurnalist, ATR telekanalı baş müdiriniñ muavini Ayder Mujdabayev «fevral 26 işi» boyunca yaqalanğan Mustafa Degermencini Yañı yıl ile hayırladı.

Rejisser Galina Cikayeva «Qırım terroristleri» işi çerçivesinde mahküm etilgen Gennadiy Afanasyevni hayırladı.

Oyuncı ve prodüser Ahtem Seytablayev Qırımnıñ daa bir siyasiy mabusı Oleg Sentsovnı Yañı yıl ile tebrikledi.

2015 senesi noyabr 30-da Qırımnıñ Yüksek mahkemesi birinci instantsiya mahkemesiniñ Qırımtatar Milliy Meclisi reisiniñ muavini Ahtem Çiygoznıñ apis cezası müddetini 2016 senesi yanvar 29-na qadar uzatmaq qararını deñiştirmedi. «Fevral 26 işiniñ» diger iştirakçileri Ali Asanov ve Mustafa Degermenciniñ apis cezaları ile bağlı mahkeme qararları deñiştirilmedi.

Rusiye taqiqatçıları olarnı 2014 senesi fevral 26-da Qırım parlamentiniñ binası yanında Ukraina topraq bütünligi ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.

Radio Svobodanıñ Qırım.Aqiqat leyhasınıñ baş muarriri Volodımır Prıtula bildire ki, bu leyha sayesinde ukrainler işğal etilgen Qırımda ve onıñ tışında apiste yatqan siyasiy mabuslarğa birdemlik köstere ve qoltutalar.

Volodımır Prıtula
Volodımır Prıtula

«Al-azırda Qırımda apiste yatqan ve Qırım tışına çıqarılğan insanlarnıñ tam sayısını bilmeyik. Amma eñ azından bu bir qaç leyha vastasınen er keske qoltutmaq istedik. Olar qorantalarınıñ yanında Yañı yılnı qarşılamaylar. Olar içün bu sene o qadar zor şaraitlerde soñki sene olacağına ümüt etemiz, ve al-azırda qanunsız şekilde mahküm etilgen ya da taqiqat altında bulunğan qırımlılar kelecek bayramlarnı aileleriniñ yanında qayd eteceklerine ümüt etemiz», – dep ayta Volodımır Prıtula.

Yañı yıl arfesinde Qırım.Aqiqat ukrain şairi ve yazıcısı Sergey Jadanğa Rusiyede 10 yıllıq apis cezasını alğan Qırım anarhisti Aleksandr Kolçenkonı hayırlamağa teklif etti.

Metnniñ asıl nushası Radio.Svoboda saytında

XS
SM
MD
LG