Link açıqlığı

Qırımtatar avımı? Rusiye politsiyası ve FSB kazaklarnen beraber basıp kireler


Rusiye cenübindeki kazaklarnıñ cigit-showsı, Aqmescit, 2015 senesi iyün 6 künü

Bu künleri kazaklar Rusiye mahsus hızmetleriniñ temsilcilerinen beraber Krasnoperekopsk rayonınıñ Küçük Mamçıq (Dolinka) köyünde qırımtatar evlerine basıp kirdiler. 9 azbar teşkerildi, yerli duraqlarnı ukrain bayrağı renklerine boyalağan insanlarnı qıdıra ediler. Köy sakinleri kazaklarnıñ areketlerine şikâyet ettiler, çünki bunıñ kibi basqınnı qanunsız sayalar.

Küçük Mamçıq köyünıñ avtobus duraqları belgisiz şahıslar tarafından ukrain devlet timsalleriniñ renklerine boyalanğan, yayan keçitleri sarı-mavı renklerine boyalandı. Qırım kazakları keçirgen basqın sebepleri budır. Bunı Krasnoperekopsk regional meclisiniñ reisi Saniye Ametova Qırım.Aqiqatqa bildirdi. Regional meclis reisiniñ yolbaşçılığı altında köy sakinleri Qırım kazaklarınıñ areketlerini qanunsız sayıp, FSBge şikâyet azırladılar.

«Bunıñnen bağlı arizalar toplaymız. FSBge yazacaqmız, çünki olar anda bar edi, ve politsiya yolbaşçısına yazacaqmız – kazaklar nege esaslanıp keldiler, ve olarnı kim yolladı. Köyge ne maqsatnen keldiler – 25 kazak. Beş soqaqqa beşer insan keldi, keçkenlerni boyalağan insanlarnı kördilermi sorağan ediler», – dep ayttı Saniye Ametova Qırım.Aqiqatqa.

Kazaklar azbarlarda sarı ya da mavı boya qıdırdılar
Saniye Ametova

Ametovanıñ aytqanına köre, kazaklar azbarlarda sarı ya da mavı boyanı qıdırdılar.

«Genç erkekler olğan 9 qorantağa kirdiler. Ana-babaları qasevetlenmege başladılar. Olar meseleni yazma şekilde añlatmalarını istediler. Soñra FSB ve politsiya keldiler. Tünevin aqşam qayda olğanını ve duraqta bu işaretlerni kim çızdı yazmağa rica ettiler», – dep ayttı Saniye Ametova.

Yerli sakinler regional Meclis reisine köyge 25 kazak kelgenini, özüni qaba ve arsız bir şekilde köstergenini ayttılar. Bundan ğayrı, ev damlarından qırımtatarlarnıñ milliy bayraqlarını alıp taşlamağa talap ettiler.

«Kazaklar qaba yanaştılar, emir eteler kibi laf ettiler. Federal hızmet bile bunı yapmadı. Kazaklar mustaqil evlerge kelip, olarnı teşkere ve qabaatlılarnı qıdıra bilelermi? Kazaklarnıñ işi degil bu. Bazı gençlerimizni aqaretlediler. Olarğa «tatar burunları» dediler. Küçük Mamçıq köyünde yaşağan bir çoq insannıñ evinde qırımtatar bayrağı asılğan. Olar bayraqlarnı nege astıñız, tez alıp taşlañız, bayraqlarıñız adamlarnı açuvlandıra, dep aytqan ediler!», – dey Krasnoperekopsk regional meclisiniñ reisi.

Saniye Ametovanıñ bildirgenine köre, saba erte duraq ve yol keçitleri boyalandı. Aynı o kün FSB hadimleri tekrar köyge kelip, bir qaç qırımtatarından milliy bayraqlarnı alıp taşlamağa rica ettiler. Ametova bunıñ kibi basqınlar qomşu köylerde de keçirilecegini red etmey.

Zair Smedlâyev
Zair Smedlâyev

Qurultay Merkeziy saylav komissiyasınıñ reisi Zair Smedlâyevniñ fikirince, bu basqınlar Qırımdaki qırımtatarlarnı «qorqutmaq içün yapılğan daa bir aktsiyadır».

«Bu cinayet, bu qanunsızlıqtır. Cemaat teşkilâtlarına qırımtatarlarnıñ evlerine basıp kirmege izin berilmedi. Sorğu, sorav, teşkerüv yapmaq aqları yoq. Ceza berilecek cinayettir. Rusiye uquq qoruyıcı organları da anda bar ediler. Rusiyeniñ resmiy akimiyetiniñ temsilcileri cinayette iştirak ettiler, demek», – dep tüşüne Zair Smedlâyev.

Qırımtatar liderleri Qırımda Rusiye akimiyeti tarafından qırımtatarlarğa qarşı basqı yapılğanını bildireler.

Ukraina Yuqarı Radası Qırımnıñ vaqtınca işğaliniñ birinci künü olaraq 2014 senesi fevral 20-ni ilân etti. Oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri Qırım işğalini tanımay ve bir sıra ceza kirsettiler. Rusiye yarımada işğalini red etip, buña «tarihiy adaletniñ ğayrıdan tiklenmesi» dep ayta.

XS
SM
MD
LG