Qırımtatar Milliy Meclisine Qırımda areket etmek içün imkân, Qırımnıñ Rusiye tarafından işğal etilmesinden evel olğanından olduqça az. Qırımtatar Milliy Meclisiniñ reisi Refat Çubarov dekabr 30 künü Kiyevde bildirgeni kibi, faaliyetniñ esas yolaqları qıtaiy Ukrainağa avuştırıldı.
Onıñ sözlerine köre, bu – tış siyasiy faaliyet ve diaspora ile alâqаlardır.
«İşğal etilgen Qırımdaki imkânlarımız evel olğanından pek az. Qırım toprağında er şeyni etip olamaymız, em de Meclislerniñ bir qısmı – 33-ten sekizi – Qırımda yaşap olamay. Bazılarına, maña da, Qırım kirişi yasaqtır, bazılarına qarşı cinaiy işler açıldı», – dedi o.
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
