Link açıqlığı

Çubarov: «fevral 26 işi» mahkemesi – masqaralıqtır


Qırım parlamentiniñ binası yanında olıp keçken miting, Aqmescit, 2014 senesi fevral 26 künü

Aqmescitte bazarertesi künü «fevral 26 işiniñ» birden eki mahkemesi olıp keçti – Qırım Yüksek mahkemesinde ve Aqmescitniñ Merkeziy rayon mahkemesinde. Mahküm etilgenler arasında Ahtem Çiygoz, Mustafa Degermenci, Ali Asanov, Arsen Yunusov, Eskender Yemirvaliyev ve Talât Yunusov. Talât 3,5 yıl şartlı apis cezası ile cezalandırıldı. Qırım Yüksek mahkemesi yanvar 15 kününe qadar iş baqılmasında teneffüs olacağını ilân etti.

Qırım Yüksek mahkemesiniñ toplaşuvı 6 saat sürdi. «Yüksek mahkemeniñ» binası yanında onlarnen kişi toplaştı, faqat «fevral 26 işi» boyunca birinci toplaşuvğa adamlarnı saylap alğan ediler. Mahkeme temsilcileri zalda yer olmağanını ayta ediler. Zalğa kirecek olğanlar arasında semetdeşlerine qoltutmağa kelgen Dilâra Seitveliyeva bar edi. Qadınnıñ aytqanına köre, soy-soplar ses-şamatı çıqarmasa edi, mahkeme zalına mahkümlerniñ tuvğanlarını da almaz ediler.

Qorqunç bir şey – mahküm etilgenlerniñ balalarına ana-babalarını körmege izin berilmedi

«Qorqunç bir şey – mahküm etilgenlerniñ balalarına ana-babalarını körmege izin berilmedi. Qadınlarğa mazallılar yol bermey edi, mahkeme zalına kirmek ne, mahkümlerni körmege bile imkân bermediler. Soñra qıçırmağa başladıq, tek qadınlar degil. Açuvımızdan patlaycaq edik. Soñra da bir qaç adamnı içeri aldılar – yalıñız tuvğanlarnı», – dep tarif etti Seitveliyeva.

Nariman Celâl
Nariman Celâl

Qırımtatar Milliy Meclisi reisiniñ muavini Nariman Celâl da mahkemege kiremedi. Toplaşuvdan soñ adliyecilerden haber aldı. Radio Svobodağa bergen malümatına köre, Ali Asanov ve Mustafa Degermenciniñ adliyecileri mahkümlerni ya ev apsi, ya da memleketni terk etmemek şartı ile azat etmege rica etken ediler. Mahkeme bu muracaatlarnı red etti. Ahtem Çiygoznıñ adliyecisi mahkemege muracaat etip, «fevral 26 işi» mahkemesini toqtatmağa rica etti, dep ayttı Celâl.

Qırım, Rusiyege köre bile, Ukraina nezareti altında bulunğan edi. Bu sebepten bu işni Ukraina uquq qoruyıcı organları baqmaq kerek

«Ahtem Çiygoznıñ imayesi muracaat etti. Adliyeci Aleksandr Lesovoy bu iş baqılmasını toqtatmağa talap etti, çünki fevral 26 vaqiaları Ukrainada olıp keçken edi. Qırım, Rusiyege köre bile, Ukraina nezareti altında bulunğan edi. Bu sebepten bu işni Ukraina uquq qoruyıcı organları baqmaq kerek. Mahkeme bu muracaatnı baqıp çıqmaq içün imkân olmağanını, ve Ukraina o vaqialarnı baqmağanını bildirdi. Olar ise işni baqmağa mecburlar, çünki zarar körgenler arasında Rusiye vatandaşları bar», – dep qayd etti Celâl.

Refat Çubarov
Refat Çubarov

Aqmescitniñ Kiyev rayon mahkemesi «fevral 26 işi» boyunca qabaatlanğanlardan biri Talât Yunusovğa üküm çıqardı. Onı 3,5 yıl şartlı apis cezası ile cazaladılar. Qırımtatar temsil organınıñ reisi Refat Çubarov fevral 26 mitinginiñ iştirakçilerine nisbeten keçirilgen mahkemeni «masqaralıq» dep adladı.

Bu mahkeme degil, bu öz toprağını imaye etken, yabancı bir ordu kelmesini istemegen qırımtatarlarnı yoq etüv ıntıluvıdır

«Olarnı qabaatlı tanıylar. Ahtem vaqialarnıñ teşkilâtçılarından biri ola, deyler. Ali Asanov ve Mustafa Degermenci – «qabaat ortaqları» oldılar. Mence, olar Rusiye Ceza kodeksiniñ 212 maddesi belgilegen cezanı alırlar. Er kes bu mahkeme qanunsız olğanını añlay, bu mahkeme degil, Ukraina mustaqilligi yılları devamında Ukrainanıñ topraq bütünligi ve mustaqilligine qoltutqan qırımtatarlarnı yoq etmek ıntıluvıdır. Qırımtatarlar öz toprağını imaye etti, anda yabancı ordularnıñ kirmesini istemegen ediler», – dep añlattı Meclis reisi.

Rusiye taqiqatçıları cinayi iş boyunca keçkenlerni 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar. O vaqıt eki insan can berdi, onlarnen insan yaralanğan edi.

Metnniñ asıl nushası Radio Svoboda saytında

XS
SM
MD
LG