Rusiye akimiyeti Milletler işleri boyunca federal agenligi tarafından keçirilgen soravnıñ qırımtatarlarğa nisbeten neticelerini gizledi. Bu aqta Qırımtatar Milliy Meclisiniñ reisi Refat Çubarov, Rusiye matbuat vastalarında aşkâr etilgen sorav aqta malümanı izaatlap, ayttı.
«Añlağanıma köre, işğal etilgen Qırımda Milletler işleri boyunca Federal agentligi tarafından keçirilgen araştırma neticeleri gizlengen. Amma jurnalistlerge bile berilgen raqamlar qırımtatar halqı, arasında olğan satqınlardan ğayrı, Qırımnıñ Rusiye terkibinde olmasınıñ imkâniyetini red etkenini köstere», – yazdı Çubarov Facebookta.
«Vedomosti» Rusiye neşiri FADN tedqiqatınıñ neticelerini aşkâr etti, olarğa köre qırımtatarlarnıñ tek 21% olarnıñ ayatında Qırım Rusiye terkibine kirgeninden soñ müsbet deñişüvleri olıp keçkenini qayd ete. «Sorav iştirakçileriniñ yarısı, Qırım Rusiye terkibine kirgeninden soñ, vaziyet deñişmegeni aqqında bildirdi, tatarlarnıñ 15% vaziyetniñ bozuluvını qayd etti. 60% - akimiyet yarım yıl içinde al etken meselelerni atyıp olamadı», – yaza neşir.
Çubarov dey ki, «soravda iştirak etken ve işğalciler içün beklenilgen cevapnı bermegen qırımtatarlarnıñ seksen fayızı ile ğururlanmağa mümkün».
Meclis reisi şunı da bildire ki, araştırmada qırımtatarlarnıñ 2014 senesi mart 16 künü «referendum»nı tanımağanı da qayd etilgen.
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
