Link açıqlığı

Saatnıñ esas haberi

Herson vilâyet devlet memuriyeti Qırım qamaçavında yaqarlıq malzemeleriniñ qıtlığı aqqında bildire. Bu aqta beyanatnı, yarımada qamaçavı boyunca aktsiyanıñ matbuat kâtibi Evelina Arifovağa esaslanıp, dekabr 16 künü vilâyet memuriyeti saytında aşkâr ettiler.

«Aşayt malları, erzaq, sıcaq urba, ilâc, qızdıruv vastaları ile teminlengenmiz», – dedi Evelina Arifova, ve yalıñız yaqarlıq malzemeleri, yani – odun yetişmegeni aqqında ayttı», – denile beyanatta.

Matbuat kâtibi aytqanı kibi, aktsiya tınç keçe, iştirakçileri, Arifovanıñ aytqanına köre, «Çonğar» kiriş/çıqış nezaret noqtası territoriyasında yerleşken diger cemaat teşkilâtları ile işbirlikte buluna.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti. Dekabr 8 künü qamaçav iştirakçileriniñ razılığı ile Qırımğa elektrik yolaqlarınıñ birinden ceryannı bermege başladılar.

Dekabr 15 künü aktsiya idarecisi Lenur İslâmov 2016 senesi başında yarımadanıñ deñiz qamaçavınıñ ola bilecegini ilân etti.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG