Link açıqlığı

Rusiye ve işğal etilgen Qırımda siyasiy sebeplerden 13 qırımlı apiste buluna. Bu aqta Kiyevde matbuat konferentsiyası devamında Vatandaşlıq serbestligi merkeziniñ faali Mariya Lısenko bildirdi.

Onıñ sözlerine köre, Qırımnıñ Rusiye akimiyeti tarafından vatandaşlıq aqlarınıñ qaba bozuluvına siyasiy sebeplerge bağlı tevqifler kire.

«Fevral 26 işi» boyunca SİZOda Ahtem Çiygoz, Mustafa Degermenci, Ali Asanov buluna. «Hizb ut-Tahrir işi» boyunca dört insan azatlıqtan marum qala. Rustam Zeytullayev, Nuri Primov, Rustem Vayatov, Ferat Saytullayevdir. Yuriy İlçenkonıñ ayrı işi bar, o da şimdi SİZOda buluna», – dey faali.

Qayd etkeni kibi, «fevral 26 işi» iştirakçilerini kütleviy tertipsizliklerde iştirak içün qabaatlaylar. Rusiye uquq qoruyıcıları olarnı 2014 senesi fevral ayında, daa Rusiyeniñ Qırım işğalinden evel, Ukraina topraq bütünligi içün Qırım parlamenti yanındaki mitingde iştirak etkenleri içün mesuliyetke celp etecek ola.

Lısenko qayd etkeni kibi, razı olmağanlarğa yarımadada tek «referendum»dan evel olğan vaqialar içün degil, yarımada tışında bile olğanından sebep qabaat bildirile. Şu cümleden, Yevromaydan faali Aleksandr Kostenkonı Kiyevde 2014 senesi fevral ayında «Berkut» bölüginiñ arbiyine sanki zarar ketirgeni içün dört yıllıq apis cezasına maküm ettiler.

Dekabr 9 künü aşkâr etilgen BMT Ukrainada insan aqlarına riayet etüv boyunca 12-nci maruzasında qayd etilgeni kibi, Qırımda Rusiye akimiyeti tarafından insan aqlarınıñ bozuluvı ep devam ete.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG