Ukrainanıñ qıtaiy qısmından Qırımnıñ işğal etilgen territoriyasına mal ve hızmetlerniñ ketirilmemesi aqqında Ukraina qarar leyhası Ukraina Nazirler kabinetiniñ toplaşuvında kelecek çarşenbe künü baqılmalı, dep bildire Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarov dekabr 6 künü.
«Böyle qararnıñ alınması ile Qırımnıñ vaqtınca işğal etilgen territoriyasına qıtaiy Ukrainadan mal ve hızmetlerniñ berilmesi tam toqtatılır», – dey Çubarov.
«Böyle vesiqanıñ qabul etilmesi ile Qırımğa qamaçav iştirakçileri tarafından de-fakto toqtatılğan mal ve hızmetlerniñ berilmesi, de-yüre toqtatılır. Qırım qamaçavı boyunca aktsiyanıñ neticelerinden biri olacaq», – qayd etti Meclis reisi.
O şunı da bildirdi ki, vesiqada mal ve erzaqnıñ vatandaşlar tarafından ketirilmesiniñ qaideleri de yazılğan.
«Er bir insan özünen içtimaiy emiyeti olğan mallarnı ketire bile, amma umumen on biñ grivnadan ve 50 kg çoq olmamalı», – dey Çubarov.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
