Ukraina siyasetşınası Sergey Taran dey ki, Rusiye prezidenti Vladimir Putin Ukraina, onıñ territoriyaları – Donbass ve Qırım aqqında unutmadı.
«Rusiye ordularınıñ arbiy qısımları ukrain territoriyasında olğance, bu olğance, Putin Ukraina aqqında unutmaz. Ve onıñ Qırım ve işğal etilgen Donbass topraqlarından ketmege niyeti olmağanını körmek kerek. Anda işğal yüz bere. Putin unutmadı», – dedi o Qırım.Aqiqat Radiosınıñ saba efirinde.
Rusiyede aytılğanı kibi, Putinniñ Ukraina vastası ile öz itibarını kötermege fırsatı olğanına qadar, Ukraina ile meraqlanacaq. Şimdi aktsent vaqtınca Suriye ve Türkiye tarafına yönelgen, dedi efirniñ diger musafiri, Radio Svoboda Rusiye hızmetiniñ mühbiri Mümin Şakirov.
«Menimce, Donbass ve Qırım er vaqıt haber alanında olacaq, şimdi aktsent vaqtınca avuştırılğan. Er vaqıt qaytmağa imkân yoq, çünki tış duşman, zapt etilgen qale felsefesi, bu ğaye er vaqıt çalışacaq», – dedi o.
Vladimir Putin dekabr 3 künü Kremlniñ Georgiy salonında Federal toplaşuvına er yıllıq muracaatında Ukraina aqqında bir şey, Qırım aqqında ise tek bir ibare ayttı.
Türkiye-Suriye sıñırında tüşürilgeninden soñ Rusiye ve Türkiye arasında munasebetler birden bozuldı, Moskva uçaq Suriye üzerinde olğanını bildire ve vaqiadan bir qaç künden soñ Rusiye akimiyeti Türkiyege qarşı sanktsiyalarnı kirsetti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
