Qırım qamaçavı vatandaş aktsiyasınıñ koordinatorı Lenur İslâmov bildirdi ki, qıtaiy Ukrainadan Qırımğa mal, aşayt mahsulatı ve elektrik berilmesi toqtatılğan soñ, yarımadanıñ «deñiz qamaçavı», şu cümleden Qırımnı Rusiye Federatsiyasınıñ Krasnodar ülkesi ile bağlağan Keriç keçiti rayonında qamaçav olacaq.
Bunı o «Otkrıtaya Rossiya» («Açıq Rusiye») neşirine ayttı.
Biz yolumızğa devam etecekmiz. Ağ qamaçavını yapacaqmız, ileride deñiz qamaçavı olacaq, Qırım bütünley etraf müitten ayırılacaq. Keriç keçitiniñ qamaçavı da olacaq. Bunı yapamaycaqmız, dep tüşünmesinlerLenur İslâmov
«Biz yolumızğa devam etecekmiz. Ağ qamaçavını yapacaqmız, ileride deñiz qamaçavı olacaq, Qırım bütünley etraf müitten ayırılacaq. Keriç keçitiniñ qamaçavı da olacaq. Bunı yapamaycaqmız, dep tüşünmesinler», – dep bildirdi İslâmov.
«Maydan inostrannıh del» fondunıñ Qara deniz regionında gemilerniñ areketlerini nezaret etken ekspertleriniñ zanınca, Qırımnıñ «deñiz qamaçavı» gemi, inşaatlar bozulğan soñ başlana bile.
Bunı fond eksperti Yuriy Smelânskiy Qırım qamaçavı iştirakçileriniñ Keriç keçitini blok etüv işi planlarını izaatlap, Qırım.Aqiqatqa ayttı.
«İşğal etilgen topraq ve işğalci memleketniñ qıtaiy qısmı arasında bağlar gemilerge hızmet etken infrastruktura bozulğan soñ üzüle bile», – dedi Smelânskiy.
«Boğaznıñ eki noqtası arasında areket etken gemilerge qarşı diversiyalar ola bile», – dep qoştı o.
Ekspert «qamaçav iştirakçileriniñ işğal etilgen topraqlarğa kirüv imkânları ve anda böyle bir şey yapmaq çaresi ceetinden qıymet kesip olamağanını» qayd etti.
Noyabr 22-de Herson vilâyetinde elektrik ağları bozulğan soñ Rusiye işğal etken Qırımğa qıtaiy Ukrainadan elektrik berilmesi toqtatıldı. Yarımadada fevqulâde vaziyet ilân etildi. Qırım Rusiyeden ketirilgen dizel generatorları ve Qırım generatsiyası vastaları işlep çıqarğan elektrik energiyası ile temin etile, amma bu yeterli degildir.
Sentâbr 20-de yarımada ile memuriy sıñırda başlağan Qırım qamaçavınıñ iştirakçileri siyasiy mabuslarnı azat etmege, halqara nezaretçilerge yarımadağa kirmege imkân bermege ve yarımadada qırımtatarlarğa qarşı basqılarnı toqtatmağa talap eteler.
Qırım Rusiye prokurorı Natalya Poklonskaya bildirdi ki, «Qırımnıñ energetik qamaçavına alâqası olğan er kes tezden cezalanacaq». Onıñ aytqanına köre, olarğa qabaatlarını isbatlamaq içün malümat toplanacaq, soñra olarnı qıdırmağa başlaycaqlar, ve soñra da Rusiye Federatsiyasında olğan bütün mal-mülkleri tevqif etilecek.
Qırım Rusiye tarafından işğal etildi. Ukraina Yuqarı Radası Qırımnıñ vaqtınca işğali 2014 senesi fevral 20-de başladı, dep resmiy şekilde ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri Qırım işğalini tanımayıp, bir sıra ceza kirsetti. Rusiye yarımada işğalini red etip, oña «tarihiy adaletniñ yeñmesi» dep ayta.
