Link açıqlığı

Cemilev Sırbistanda Avropa diplomatlarına Qırımda insan aqlarınıñ bozuluvı aqqında tarif etti


Saba, dekabr 3-de, Sırbistan paytahtı Belgradda ОSCE Nazirler şurası sessiyasınıñ başlanuvıdan evel Ukraina prezidentiniñ qırımtatar halqınıñ işlerinden vekâletlisi Mustafa Cemilev Ukraina, Latviya, İsveçiya, Danimarka, Norvegiya, Kanada, AQŞ, Türkiye tış işler nazirleri ile körüşip, olarnı Qırımdaki insan aqları ile bağlı şimdiki vaziyet ile tanıştırdı.

Bu aqta vekâletliniñ mabuat hızmeti bildire.

«Subet devamında sayğılı diplomatlar işğal etilgen Qırımnıñ şimdiki vaziyeti ile tanış oldılar. Olarğa QMC ve Aqyarnı qanunsız tarzda işğal etken Rusiye Federatsiyası tarafından insan aqları ve halqara uquqnıñ bozuluvı aqqında malümatnı bildirdiler», – denile beyanatta.

Mında şunı da qayd ettiler ki, Avropa ve halqara institutları tarafından yapılacaq müim adımlardan biri – yarımadağa nezaret eyyetiniñ yollanılmasıdır.

Ukraina prezidentiniñ qırımtatar halqınıñ işlerinden vekâletlisi, qırımtatarlarnıñ milliy yetekçisi Mustafa Cemilev çarşenbe künü Sırbistan paytahtı Belgrad şeerinе ёл алды. Şu künleri Sırbistan paytahtında ОSCE memleketleriniñ tış işler nazirleri toplaşacaq. Dekabr 3-4 künleri mında er yıllıq Nazirler şurasınıñ körüşüvi keçirilecek, teşkilât ile bağlı meseleler baqılacaq ve mütenasip qararlar alınacaq. Qırım kün tertibinde olmalı.

Qırımtatarlarnıñ yetekçileri aytqanı kibi, Ukraina iştiragi ile keçirilgen bütün halqara körüşüvlerde «Qırım meselesi» muzakere etilmeli.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG