Link açıqlığı

Rusiye Federatsiyasınıñ prezidenti Vladimir Putin çarşenbe künü, dekabr 2-de, iş ziyareti ile Qırımğa keldi. Bunı Twitterde Qırımnıñ rus ükümetiniñ başı Sergey Aksenov bildirdi.

TASS Rusiye agentligi bildirgeni kibi, Aqmescit ava limanından Putin birden «Krımenergo» şirketine yol aldı, mında «yarımadağa energetik köprüniñ birinci yolağınıñ qoyulmasında iştirak etecek».

Dekabr 2 künü devamında Qırım matbuat vastaları Qırımğa köpürniñ birinci yolağınıñ qoyulması aqqında malümatnı aşkâr ete edi. «Novosti Krıma» saytı bildirgeni kibi, dekabr 2 künü energetik köprüniñ birinci yolağınıñ qoyulması planlaştırıla edi, bu sebepten «Keriçke jurnalistlerni ketirdiler».

«Qaynaqnıñ malümatına köre, bugün bir qaç kere energetik köprüni işlettirecek oldılar, amma tehnikiy sebeplerden yapıp olamadılar», – dep bildire neşir.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG