Sveta gece de, kündüz de kelmege başladı. Cedvelni bozıp, keç qala, amma eki saatten ziyade oturmay. Öyle bir qaş çatqan ki, buzdolabı bile onıñnen iş tutmaq istemey, aqşam üstü generator kelecegini bilip, oña daa çoq inana. Çamaşır maşinası bir kün Svetanen çamaşır yuvmağa istedi, amma o eñ müim daqqada qaçıp ketken soñ, ekinci kere çamaşırnı elde çayqamağa ve sıqmağa mecbur oldıq. Suvnı maşinadan tökmek içün Svetanı tekrar beklemek kerek.
…Uzaqtan soylarımız keldi. Elektrikler kesilmese edi, daa uzun zaman devamında körüşmez edik, dep küldik. Sveta da cedvel boyunca keldi. Büyükler qonuştı ve haberlerni baqtı, gençler ise İnternetke kirip yetiştirdiler. Tuvğanlarımız köylerinde qamaçavğa qarşı petitsiyanı imzalamağa teklif etilgenini ayttılar. Kimse imzalamay! Vatnikler acımağa rica etken ediler – bizimkiler de başta tüşünmek kerek olğanını ayttılar.
Toplu yaşanğan qasabada oturğan tanışlarımız qamaçavğa açuvlandılar (qorantanıñ küçük balası bar). Olarğa Balbesniñ (ahmaqnıñ) petitsiyasını imzalamağa teklif ettik. Canları ağırdı: «Bizni ne sayasıñız»? Ve generatornı satın aldılar.
...Keçenlerde Sveta İnternetsiz keldi. Provayderge qavğa yetmek içün telefon ettik – bir ay içün para beremiz, amma künde eki saat bile qullanıp olamayıq. Mütehassıs ketken eken. Qaytsa, problemleriñizni baqar, dediler. Mütehassısıñız kelgence, Sveta keter! Telefonda laf etkenimiz qız pek açuvlandı, donatmalar sıq-sıq elektrik kesilmesine dayanamay dep.#Qırımbizimamma
…Bala bağçaları eki aftadan berli çalışmay, bu sebepten bazı ana-babalar balalarını işke almağa mecburlar (anda da Sveta olmasa, evge kete bileler). 4 yaşında balanı ofiske ketirdiler. Ağa ve tatalar oynap otura:
– Güzel bir oğlançıq, adıñ ne, qaç yaşındasıñ, qayda yaşaysıñ...
– Ukrainada...
Ofiste Rusiyeden kelgen bir qaç kişi çalışa. Er kes susıp otura. Bala kerçekni ayta, deyler de.
...Bazarertesi künü sabadan üylege qadar Aqmescitniñ merkezinde (Kirov caddesi, Puşkin ve Karl Marks soqaqları) ışıq yoq edi. Adalet yeñdi! Sveta, kimsege ketme!
Elzara Beşuyli, bloger, qırımlı
«Bloglar» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışlarını aks ettirmemesi mümkün