Qırım qamaçavı faalleriniñ areketleri ve talapları neticesinde yarımadada siyasiy mabüslerniñ sayısı arta bile.
Bu fikirni Qırım.Aqiqat Radiosınıñ efirinde İnsan aqları boyunca Qırım alan eyyetiniñ temsmilcisi Оlga Skripnik bildirdi.
«Ayırımlar apparatı anda bar küçü ile çalıştırıldı. İnsanlarnı taqip eteler. Bu tintüvler ve başqa areketler neticesinde yañı insanlarnı yaqalay bileler», – dey o.
Uquq qoruyıcılarnıñ fikrine köre, ukrain siyasiy mabüslerniñ azat etilmesi içün tek Ukraina tarafından basqı yeterli degil, Avropa memleketlerini de celp etmek kerek.
«Diger taraflardan da sanktsiyalarnı arttırmaq kerek, halqara toplulıq aqqında aytam, Rusiye iqtisadiy ceetten bağlı olğan memleketler tarafından da basqı olmalı», – dey Skripnik.
Çarşenbe künü, dekabr 2-de, Sudaqta Rusiye mahsus hızmetleri rayon meclisiniñ reisi İlver Ametovnıñ evinde tintüv keçirdiler. Bundan evel, noyabr 30 künü Qırımda İçki rayon regional meclisiniñ reisi Rustem Mennanov, İslâm-Terek regional meclisiniñ reisi Ekrem Abdulvatovnıñ evlerinde tintüv keçirildi.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
