Qırımnıñ rusiyeli başı Sergey Aksenov şeer ve rayon başlarını dizel-generatorlarnıñ tarqatılmasına mesuliyet ile yanaşmağa çağırdı. Şu cümleden, er bir region generatorlarnıñ quveti ve yerleşirilmesi, olarğa elde etilgen yaqarlıq aqqında esabat azırlamalı, dep bildire Qırımnıñ rusiyeli ukbmetiniñ matbuat hızmeti.
Böyle avaleni Aksenov fevqulâde vaziyetniñ yoq etilmesi boyunca ştabnıñ nevbetteki toplaşuvında çıqardı.
Bunıñ ile toplaşuv devamında yaqarlıqnıñ dizel-generatorlar içün vaqtında ketirilmesi ile bağlı sual muzakere etildi.
«İlk nevbette yaqarlıqnıñ ketirilmesinde mesuliyetli olacaq insanlarnı belgilemek kerek. Bu mesele ile belediyeler oğraşsa, ştab maliye tarafından yardım köstermeli, rayon ve şeerlerniñ yolbaşçıları yaqarlıq miqdarı aqqında esabat bermeli», – qayd etti Sergey Aksenov.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tamirlediler, amma faaller onı işlettirmege bermey. Qırım qamaçavınıñ idarecisi Lenur İslâmov Rusiye tarafından siyasiy mabüslerniñ, şu cümleden qırımtatarlarnıñ azat etilmesinde israr ete.
Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
