Link açıqlığı

Aqmescitte belgisiz şahıslar Ukrain medeniy merkeziniñ faali Veldar Şukurciyevniñ evine kirecek edi. Bu aqta o Qırım.Aqiqatqa bildirdi.

«Dört belgisiz şahıs, özlerini tanıtmadılar. Qapını qaqa, qıçıra, şamata qopara, pis laf ayta, fotoaррaratqa çıqara ediler… Nasıldır bir protokol berecek ediler. Nasıl protokol, añlaşılmay. Avgust 11 künü sebebinden dey ediler, Lenin meydanında Ukraina bayrağı ile foto yapqanım içün. Amma mende bu protokol endi bar. Şu künü yaqalap, protokolnı berdiler, avgust 11-de. Şimdi başqa bir protokol, deñiştirilgen protokol deyler, onı mıtlaqa almalım», – dey faali.

Sözlerine köre, vaqia aqqında politsiyağa bildirdi, «amma olar seslenmediler».

Şukurciyevniñ sözlerine köre, şimdi belgisiz şahıslar «sanki ketkenler». Özü de daireni terk etti ve ne vaqıt evge qaytacağını bilmey.

Faali bazarertesi künü prokuraturağa barıp, «insanlarnıñ kim olğanı ve ne istegeni aqqında» soraycaq ola.

2015 senesi avgust 11 künü ukrain bayrağı ile foto çıqarğan Veldar Şukurciyev, İrina Kopılova ve İrina Birükovanı politsiya bölügine ketirdiler. Protokol tizip, azat ettiler.

Noyabr 25 künü Şukurciyev yarımada ile memuriy sıñırda Rusiye sıñırcıları tarafından yaqalanğan edi. Bir qaç saat devam etken sorğudan soñ onı Aqmescitke yolladılar.

Mart 9-da ukrain şairi Taras Şevçenkonıñ hatıra aktsiyasında bir sıra ukrain faali, şu cümleden, Veldar Şukurciyev de yaqalanğan ediler.

Soñra mahkeme olıp keçti, faallerni ukrain timsallerini qullanğanlarından sebep cezaladılar. Er birine 40 saatlik mecburiy işler berildi. Tezden bazı faallerniñ mecburiy işleri para cezasına deñişti.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG