Qırımtatar halqınıñ aq-uquqlarını qorçalav komitetiniñ idarecisi, Qırımtatar Milliy Meclisiniñ azası Eskender Bariyev İçki rayonı Mañ Kermen köyü sakini İsa Halilovnıñ yaqalanuvı aqqında tarif etti.
Eskender Bariyev Facebook saifesinde yazğanı kibi, İsa Halilovnı «akimiyetke riayetkâr olmağanı» içün yaqaladılar.
«Süt almaq içün nevbette tura edi. Anda turğan bitaçıqlar onı ve bütün qırımtatarlarnı elektrik energiyasınıñ söndürilmesinde qabaatlamağa başladılar. İsa olarğa medeniy sürette er şeyni añlattı. İnsanlar bunı begenmedi, köy şurası reisine şikâyet ettiler. O, politsiyanı çağırdı», – dedi Bariyev.
Qırımtatar halqınıñ aq-uquqlarını qorçalav komitetiniñ idarecisi, Qırımtatar Milliy Meclisiniñ azası aytqanı kibi, birazdan Halilovnı azat ettiler.
Qırımnıñ uquq qoruyıcı organlarından bu aqta resmiy izaat yoqtır.
Rusiye Qırımnı 2014 senesi baarde işğal etkeninden soñ yarımadada qırımtatarlar ğayıp olmağa başladı. Qırımda Rusiye Taqiqat komitetiniñ idaresi cinaiy işlerni açtı, amma bu insanlarnıñ bulunuv yeri aqqında alâ daa malümat yoq.
