Link açıqlığı

Ğayıp olğanlar: İslâm Cepparov ve Cevdet İslâmov


Aqmescit – Bir yıl evelsi Qırımda 19 yaşında İslâm Cepparov ve onıñ eki doğmuş ağası 23 yaşında Cevdet İslâmov ğayıp oldılar. Gençlerniñ tuvğanları buña mahsus hızmetlerniñ alâqası bar olğanını tüşüneler. Uquq qoruyıcı organlarnıñ hadimleri gençlerni esir alğan adamlarnıñ izini alâ daa tapmadılar.

Abdureşit Cepparov
Abdureşit Cepparov

Belli qırımtatar faali Abdureşit Cepparovnıñ oğlu İslâm Cepparov ve Cevdet İslâmov 2014 senesi sentâbr 27-de Qarasuvbazarda ğayıp oldılar. Şaatlarnıñ aytqanına köre, o kün aqşam «Qısmet» tükânınıñ yanında (Aqmescit-Keriç yolunıñ 40-ıncı km) belgisiz şahıslar Volkswagen Transporter mikroavtobusından enip, gençlerni maşinağa oturttılar ve belgisiz bir tarafqa alıp kettiler. Olarnı bir qaç yengil maşina taqip etken edi.

Qaçırılğan İslâmnıñ babası yüz bergen adiseni ögrenip, birden oña telefon etti, amma oğlunıñ telefonı evde qaldı. «FSB hadimine muracaat ettim, o, politsiyağa telefon etmege tevsiye etti, men bunı da yaptım, soñra Remzi İlyasovğa (Qırım Devlet şurasınıñ spiker muavini – QA) telefon ettim, dostlarıma haber ettim. Arizalar berildi, Taqiqat komiteti celp etildi», – dep añlattı Qırım.Aqiqatqa Abdureşit Cepparov. Onıñ aytqanına köre, olıp keçken adise içtimaiy ağlar ve kütleviy haber vastaları yardımınen aydınlatılğan soñ yuqarıdan diqqat etmege başladılar.

Bir qaç saatten soñ Cepparovlar qorantasınıñ evine uquq qoruyıcı organlarınıñ hadimleri keldi. Olar bilgisayarnıñ sistem blokunı, ğayıp olğan oğlunıñ bazı şahsiy eşyalarını ve DNK-ekspertizası içün tiş fırçılarını aldılar.

Rusiye Federatsiyası Taqiqat komitetiniñ Qırım Cumhuriyeti boyunca Baş taqiqat idaresi Rusiye Ceza kodeksiniñ 126-ncı maddesi 2-nci qısmınıñ «a,j» noqtaları («evelden añlaşıp eki ve ekiden ziyade insannı qaçıruv») boyunca cinaiy iş açtı.

2014 senesi sentâbr 27-de aqşam Qarasuvbazarda Cepparov ve İslâmovnı «belgisiz şahıslar küç qullanaraq maşinağa oturtıp, belli olmağan yerge alıp kettiler»

Taqiqat malümatına köre, 2014 senesi sentâbr 27-de aqşam Qarasuvbazarda Cepparov ve İslâmovnı «belgisiz şahıslar küç qullanaraq maşinağa oturtıp, belli olmağan yerge alıp kettiler».

Hızmet saytındaki «Ğayıp olğanlar» bölüginde İslâm Cepparov ve Cevdet İslâmovnıñ fotoresimleri qoyuldı. Bu malümatlar saytta bugün de bar.

Aynı vaqıtta Ukraina Baş prokuraturası İslâm Cepparov ve Cevdet İslâmovnı qaçıruv boyunca cinaiy taqiqatqa başladı. Cinaiy iş Ukraina Ceza kodeksiniñ 146-ncı maddesi 2-nci qısmı («eki ve ekiden ziyade insannı azatlıqtan marum etüv ya da qaçıruv»).

Açuvlanğan cemaat

O vaqıt Qırımda ilk olmağan qırımtatar gençleriniñ qaçıruvı cemaatnı raatsızladı. Adiseden bir qaç kün keçken soñ Abdureşit Cepparovnıñ Qarasuvbazar rayonındaki Sarı-su evinde vatandaşlar toplaştı. Toplaşqanlar adisege açuvlanıp, vatandaşlarnıñ toplaşuvını körmemezlikke urğan Qırım akimiyetine memnüniyetsizligini bildirdiler. O kün Rusiye prezidentiniñ Qırım federal bölgesindeki temsilciliginde vekâletli temsilci Oleg Belaventsev ve cumhuriyet yolbaşçısı Sergey Aksenov Abdureşit Cepparov ve onıñnen beraber kelgenlernen körüştiler. Faalniñ aytqanına köre, akimiyet «işni soñuna qadar alıp baracağını» bildirgen edi.

Eki künden soñ Aksenov açuvlanğan sakinlernen körüşmek maqsadında Qarasuvbazarğa keldi. Körüşüv neticesinde İnsan aqları boyunca Qırım kontakt gruppasınıñ qurulması aqqında añlaştılar. Onıñ erkânına Cepparovdan ğayrı, uquqçı, cemaat faalleri ve ğayıp olğanlarnıñ soy-sopları kirdi.

«İzlerni yoq eteler»

Bir yıldan ziyade keçti, amma Rusiye ya da Ukraina uquq qoruyıcı organları bir de bir neticege kelmediler.

Qırım.Aqiqat Rusiye Federatsiyası Taqiqat komitetiniñ Qırım Cumhuriyeti boyunca Baş taqiqat idaresi reberiniñ birinci yardımcısı Yevgeniya Belikova ile bağlanmağa tırıştı, amma o izaatlarğa azır degil edi.

Aqımdaki seneniñ fevral ayında Qırım Taqiqat komitetiniñ reberi Mihail Nazarov ğayıp olğan vatandaşlar boyunca işlerniñ müddeti olmağanını ayttı. «Noqta qoyulğanına qadar taqiqat keçirile», – dep aytqan edi Nazarov.

Teşkil etilgen bir şey, buyruq, emirler oldı
Abdureşit Cepparov

«Teşkil etilgen bir şey, buyruq, emirler oldı», – bir yıldan soñ Abdureşit Cepparov oğlu ve torunınıñ ğayıp olmasını bu sözlernen ifadeley.

Taqiqat gençlerniñ qaçırılması işinde bir de bir şeyni qayd ettimi sualine o şunı dedi: «Bugün bilgenimiz: Taqiqat komiteti çalışa, qıdıralar sanki. Amma añlaymız: olar qıdırmaylar, aksine, izlerni yoq eteler – olarnıñ işi olğanını añlaymız».

Bundan ğayrı, Cepparovnıñ aytqanına köre, uquq qoruyıcı organlarınıñ vekilleri işni taqiq etip, zarar körgenlerge ve şaatlarğa basqı yapalar.

XS
SM
MD
LG