«Qırım» ve «Qırım birligi» Rusiye tarafını tutqan qırımtatar teşkilâtlarınıñ birleşüvi, Qırım akimiyeti istegeni kibi, Meclisniñ yerini almaz. Bunı Qırımtatar Milliy Meclisiniñ reis muavini Nariman Celâl bildirdi.
«Eminim, bu «birleşüvden» çoq şey deñişmez. O, olarnıñ ayrı-ayrı faaliyeti kibi, qalp platforma negizinde qurula. Olar bir ğaye içün degil de, «Meclisniñ yerini almaq içün» meydanğa keldi ve inkişaf eteler. Reberleri tarafından belgilengen küçü budır. Bunı añlaylarmı, bilmeyim», – dey o, haber ete Meclisniñ matbuat hızmeti.
Böyleliknen Celâl Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetiniñ reisi Zaur Smirnovnıñ «Qırım» ve «Qırım birliginiñ» birleşüvi aqqında aytqanını izaatladı.
«Bundan Mecliske iç te zarar körmeyim, faaliyetimiz bam-başqadır. Meclisni akimiyetten acele çetleştirip, bizden qırımtatarlarnıñ bir çoq er künlük meseleleriniñ al etüvi boyunca mesuliyetni aldılar. Bunı öz omuzlarına yüklediler. Küçleri yetermi? Şübeli», – dey Celâl.
Dey ki, böyle areketler ile Qırımnıñ rusiyeli akimiyeti Mecliske milliy areket başına qaytmağa imkân bere.
Oktâbr 23 künü Rusiye Federatsiyasınıñ Cemaat palatası Rusiye Baş prokuraturasına muracaat etip, Qırımtatar Milliy Meclisiniñ faaliyetini ekstremizmge teşkermege rica etti. Böyle muracaatnıñ sebeplerinden biri – Qırımnıñ Herson vilâyeti tarafından «ticariy» qamaçavı oldı. Qırımnıñ rusiyeli prokurorı Natalya Poklonskaya Meclisniñ «ekstremist teşkilât» olaraq tanılacağını ve faaliyetiniñ yasaq etilecegini nazarda tutqanını bildirgen edi.
Rusiye Qırımnı 2014 senesi baarde işğal etkeninden soñ, qırımtatarlarnıñ yetekçileri Refat Çubarov ve Mustafa Cemilevge yarımada kirişini beş yılğa yasaq ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
