Qırımnıñ rusiyeli akimiyeti milletlerara munasebetler saasındı «siyasiy istiqrarnıñ teminlevi içün çoq şey yapılğanı» aqqında bildire.
Bu aqta yarımadanıñ rusiyeli ükümetiniñ matbuat hızmeti bildire.
«Qırım cumhuriyetinde milletlerara munasebetler saasında siyasiy istiqrarnıñ teminlevinde bayağı neticelerge irişildi, sayısı az olğan halqlar aqlarınıñ uquqiy kefaletleri meydanğa ketirildi ve milliy-medeniy muhtariyetlerniñ inkişafı boyunca emiyetli adımlar atıldı», – dedi şimdiki Qırım nazirler şurasınıñ reis muavini Ruslan Balbek «Çoq milletli Qırım zemaneviy halqara kоntekstinde» I Halqara konferentsiyasında.
Balbek aytqanı kibi, Qırımda «bütün milliy-medeniy cemiyetlerniñ yolbaşçıları, bütün diniy yetekçiler ile dialog alıp barıla».
Onıñ sözlerine binayen, Qırımnıñ şimdiki ükümeti bütün milletler ve dinlerniñ inkişafı içün musaviy şaraitlerni teşkil etmek niyetindedir.
Evel Qırımtatar Milliy Qurultayınıñ Merkeziy saylav komissiyasınıñ reisi Zair Smedlâyev noyabr 14-ne keçer gecesi Canköy rayonı Küçük Alqalı (Zavet-Leninskiy) köyünde yerleşken camige ücüm – Qırımda vaziyetniñ kerginleşüvine nevbetteki adım olaraq adladı.
Onıñ sözlerine köre, tevqif ve qanunsız apis cezaları, qırımtatarlarnıñ hırsızlavı ve öldürüvi, camilerniñ ateşke berilmesi ve abravı, qırımtatar timsalleri ile maşinalarnıñ bozuluvı, qırımtatar timsallerini qullanmaq yasağı – regionda vaziyetniñ kerginleşüvine yönelgen areketlerdir.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
