Link açıqlığı

Rusiye ükümetinde Qırımdan 1944 senesi sürgün etilgenlerge imtiyazlarnıñ berilmesini muzakere etecekler


Rusiye Federatsiyası ükümetinde bazarertesi künü Qırımdan 1944 senesi sürgün etilgenler içün mesken aluv imtiyazlarını muzakere etecek olalar.

Rusiye matbuat vastaları bildirgeni kibi, işbu sual ükümet toplaşuvınıñ kün tertibine kirsetilgen.

«Qanun leyhasına köre, Qırım MSSC territoriyasından qanunsız sürgün etilgen vatandaşlar ya da olarnıñ soyları (bita, qartbaba, baba, ana, aqay, apay, balları, torunları, qardaşları) içün mesken aluv imtiyazları berile bile», – denile qanun leyhasında. Bundan evel işbu qanun leyhası Rusiye ükümetiniñ mahsus komissiyası tarafından desteklengen edi.

Qanun leyhasınıñ müellifleri degeni kibi, şimdi bir 40 biñ öyle insan bar.

Ukraina Yuqarı Radası noyabr 12 künü «Qırımtatar halqınıñ genotsidi aqqında» qarar leyhasına rey berdi. Zaruriy 226 deputattan 245 qol tuttı.

Qırımtatar halqı 1944 senesi mayıs 18 künü yarımadadan mecburen sürgün etildi. Sovet akimiyeti bunı «qırımtatarlarnıñ Ekinci cian cenki vaqtında natsist Almaniya ile işbirlikte buluması» ile añlattı. 1989 senesi SSCB Yuqarı Şurası sürgünlikni qanunsız ve cinaiy tanıdı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG