Link açıqlığı

Stets: qırımtatar sürgünliginiñ genotsid olaraq tanılması – Ukraina siyasiy pişkinliginiñ timsalidir


Ukraina Haber siyaseti naziri Yuriy Stets Ukraina Yuqarı Radası tarafından 1944 senesi qırımtatar sürgünliginiñ genotsid olaraq tanılması aqqında qararınıñ qabul etilmesini «ukrain devletiniñ siyasiy pişkinligi ve mesuliyetiniñ» timsali kibi tanıy.

Bu aqta ukrain naziriniñ beyanatında aytıla.

«Mayıs 18 künü endiden tamır halqınıñ maqsatkâr yoq oluvı neticesinde elâk olğanlarnıñ hatıra künü olaraq sayıla», – dey Stets ve qırımtatar halqınıñ Vatanına qatmaq ıntıluvında cesürligini qayd ete.

Onıñ fikrine köre, Qırım tamır halqı «kene serbest ayat aqqı oğrunda küreşe».

«Qırım Rusiye Federatsiyası tarafından işğal etilgeninden soñ, qırımtatarlar kene Qırım tamır halq olaraq serbet yaşamaq ve Ukraina terkibinde avropa ailesiniñ qısmı olmaq içün küreşe», – denile bildirüvde.

Nazir dey ki, Yuqarı Rada qararı ile «Ukraina «totalitar rejim ayırımlarından zarar körgen halq – qırımtatarlarğa birdemligini kösterdi».

«Ukraina cemaatı qırımtatar halqınıñ accısını tek añmay, er kün şarqiy cebede Qırımnıñ azat etilmesi içün qanını bere. Aynı şunıñ içün Qırım kelecegi – avropalı Ukraina ile birliktedir, mında qırımtatar halqınıñ aqları tanılğan ve uquq çıqarıcı seviyesinde teminlengen», – dey Stets.

Ukraina Yuqarı Radası noyabr 12 künü «Qırımtatar halqınıñ genotsidi aqqında» qarar leyhasına rey berdi. Zaruriy 226 deputattan 245 qol tuttı.

Qırımtatar halqı 1944 senesi mayıs 18 künü yarımadadan mecburen sürgün etildi. Sovet akimiyeti bunı «qırımtatarlarnıñ Ekinci cian cenki vaqtında natsist Almaniya ile işbirlikte buluması» ile añlattı. 1989 senesi SSCB Yuqarı Şurası sürgünlikni qanunsız ve cinaiy tanıdı.

XS
SM
MD
LG